11 ноябрь куни шифохонага ётқизилгани хабар қилинган ФИФА президенти Йозеф Блаттер бугун шифохонани тарк этди. Бу ҳақда Reuter нашри хабар берди.

У шифохонага асаб тизимидаги муаммолар сабабли тушиб қолганди.

"Жаноб Блаттер бир неча кун шифохонада бўлди. У бу вақтда соғлигини барқарорлаштириш билан банд бўлди", деб маълум қилган унинг маслаҳатчиси Клаус Штелькер.

Эслатиб ўтамиз, 8 октябрь куни ФИФА ахлоқ қўмитасининг арбитраж палатаси Блаттерни ўз лавозимидан ва футболдаги фаолиятидан 90 кунга четлаштирганди. У билан биргаликда УЕФА президенти Мишель Платини ва ФИФА Бош котиби Жерома Вальке ҳам шу муддатга футболдан четлаштирилганди.

Швейцария Адлия федерал бюроси 25 сентябрдан Блаттерга нисбатан жиноий иш қўзғаганди. Йозеф пулларни ўзлаштиришда гумон қилинмоқда.

Маълумот учун, Блаттер ФИФА президентлигида 1998 йилдан буён ишлаб келаётганди. Жорий йилнинг 29 май куни бўлиб ўтган сайловларда ҳам у ғалаба қозонган бироқ ташкилотда коррупция билан боғлиқ можаролар пайдо бўлгач, 2 июнда истеъфога чиқиши ҳам маълум қилганди.

Айни вақтда, кейинги сайловларгача ФИФАни вице-президент Исса Ҳаяту (Африка Футбол конфедерацияси раҳбари) вақтинчалик бошқариб турибди.