Якунига етаётган мавсумни юқори кайфиятда ўтказган иқтидорли ярим ҳимоячи Санжар Шоаҳмедов қисқа фурсатда “Локо” мухлислари меҳрини қозонди. У ўзининг тезкор ўйини, абжир хатти-ҳаракатлари ҳамда бир-биридан чиройли голлари орқали “темирйўлчилар” кўнглини забт этди.
Санжар Шоаҳмедов ҳозирда 14та гол билан олий лига тўпурарлари сафида бормоқда. Ва бу кўрсаткичи билан ярим ҳимоячи “Локомотив” тарихидаги энг яхши тўпурарлар рўйхатида олтинчи ўринга кўтарилиб олди. Биринчи ўриндаги футболчи кимлигини биласизми? Бизнингча, кўпчилик дарҳол топган бўлса керак, бу – Марсель Идиатуллин. Ўз вақтида “Локо” сафида ажойиб ўйинларни ўтказган Идиатулин 42та гол уришга муваффақ бўлган. Ва у “Локомотив”нинг шу пайтгача энг яхши тўпурари бўлиб турибди. Айни пайтда Марсель Идиатуллин “Локомотив” футбол мактабида ишламоқда ва 1997 йилда туғилган футболчилар мураббийи ҳисобланади.
Ундан кейинги ўринни эса 30та гол билан Фарҳод Тожиев эгаллаб турибди. Жорий мавсумни асосан ўринбосарлари таркибида ўтказган Иван Нагаев ҳозирча 17та гол урган ва учинчи ўринда бормоқда. Тўртинчи-бешинчи ўринларни эса бир хил 16та гол билан Олим Навкаров ва Зайниддин Тожиев банд қилиб туришибди. Айтиб ўтганимиздек, Санжар Шоамеҳдов олтинчи ўринда келяпти ва унинг ҳисобида 14та гол бор. Дарвоқе, тўпурарлик бобида Санжарни изма-из таъқиб этиб келаётган ҳужумчи Марат Бикмаев ҳисобида ҳозирча 13та гол мавжуд.
“Локомотив” таркибида камида ўнта ва ундан кўп гол урган футболчилар орасида тўрт нафар футболчи ҳозир ҳам “темирйўлчилар” сафида фаолиятни давом эттиришмоқда. Булар – Иван Нагаев, Марат Бикмаев, Санжар Шомеҳдов ва Ислом Тўхтахўжаев. Тўхтахўжаев шу кунгача “қизиллар” таркибида 11 марта тўп киритишнинг уддасидан чиққан.
Қуйида “Локомотив” тарихидаги 15та энг яхши тўпурарни келтириб ўтамиз:
1. Марсель Идиатуллин – 42 гол
2. Фарҳод Тожиев – 30
3. Иван Нагаев – 17
4. Олим Навкаров – 16
5. Зайниддин Тожиев – 16
6. Санжар Шоаҳмедов – 14
7. Музаффар Умрзоқов – 13
8. Марат Бикмаев – 13
9. Акмал Холматов – 12
10. Ислом Тўхтахўжаев – 11
11. Азиз Ҳайдаров – 11
12. Виктор Клишин – 10
13. Ойбек Усмонхўжаев – 10
14. Садриддин Абдуллаев – 9
15. Равшан Бозоров – 9
