Мана 24-миллий чемпионатимиз ҳам ўз ниҳоясига етди.
Олий лига жамоалари ажойиб мавсумни ўтказишди, десак хато бўлмаса керак. Зеро, чемпионлик масаласи сўнгги турдагина ҳал этилди. Бунақаси бизнинг чемпионатимизда камдан-кам бўлишини барчамиз жуда яхши биламиз.
Қолаверса, элитани қайси жамоалар тарк этиши ҳам охирги турга қадар мавҳум бўлиб турди. Бу эса Олий Лига-2015 интригага бой мавсум бўлганидан далолатдир.
Хўш, ортда қолган мавсумда жамоалар рақиб дарвозасини ишғол қилиш борасида қандай натижа қайд этишди? Қайси жамоа энг кўп гол урди? Қайси клуб қолганларга қараганда кўпроқ гол ўтказиб юборди?
Тошкентнинг икки клуби – “Пахтакор” ва “Локомотив” олтин медаллар учун охирги турга қадар кескин кураш олиб боришди. Буни ушбу икки клуб киритган голлар сонидан ҳам билсак бўлади. “Пахтакор” ҳам, “Локомотив” ҳам мавсум давомида 66 тадан гол киритишди. Бу орқали ушбу жамоалар чемпионатнинг энг сермаҳсул клублари бўлишди. Чемпион жамоа – “Пахтакор” ўз дарвозаси тўридан 23 марта тўп олиб чиққан бўлса, “Локо” дарвозаси рақиблар томонидан 22 бор ишғол қилинди.
Элитада базўр жон сақлаб қолган “Андижон” эса мавсум давомида энг кам гол киритган жамоа бўлди. Андижонликлар 30 та учрашувда 27 марта гол уриша олди, холос.
Жиззахнинг “Сўғдиёна” жамоаси эса энг кўп гол ўтказиб юборган жамоа бўлди. Жиззахликлар чемпионат давомида жами 60 марта тўпни ўз дарвозаларидан олиб чиқишга мажбур бўлишди. Бу эса “Сўғдиёна”нинг ҳар бир учрашувда ўртача 2 та гол ўтказиб юборганини англатади.
Олий Лига-2015 якуний жадвали:
| № | Жамоа | Ўйин | Ғалаба | Дуранг | Мағлубият | Т-Н | Очко |
|---|---|---|---|---|---|---|---|
| 1 | Пахтакор | 30 | 24 | 3 | 3 | 66-23 | 75 |
| 2 | Локомотив | 30 | 23 | 5 | 2 | 66-22 | 74 |
| 3 | Насаф | 30 | 19 | 5 | 6 | 46-20 | 62 |
| 4 | Бунёдкор | 30 | 18 | 5 | 7 | 44-19 | 59 |
| 5 | Нефтчи | 30 | 16 | 4 | 10 | 41-30 | 52 |
| 6 | Олмалиқ | 30 | 12 | 8 | 10 | 53-48 | 44 |
| 7 | Машъал | 30 | 11 | 5 | 14 | 37-42 | 38 |
| 8 | Навбаҳор | 30 | 11 | 4 | 15 | 40-51 | 37 |
| 9 | Металлург | 30 | 10 | 6 | 14 | 44-38 | 36 |
| 10 | Қизилқум | 30 | 10 | 4 | 16 | 37-49 | 34 |
| 11 | Шўртан | 30 | 8 | 9 | 13 | 42-53 | 33 |
| 12 | Қўқон-1912 | 30 | 9 | 4 | 17 | 31-52 | 31 |
| 13 | Андижон | 30 | 8 | 4 | 18 | 27-56 | 28 |
| 14 | Бухоро | 30 | 7 | 5 | 18 | 31-53 | 26 |
| 15 | Сўғдиёна | 30 | 8 | 2 | 20 | 31-60 | 26 |
| 16 | Динамо | 30 | 6 | 7 | 17 | 28-48 | 25 |
