Футбол бўйича Сингапур миллий чемпионати жаҳондаги энг антиқа ва қизиқарли тарихга эга миллий биринчиликлардан саналади. Боиси Сингапур S-Лигасида нафақат Сингапур, балки Япония, Франция, Малайзия, Хитой ва Бруней каби мамлакатларнинг клублари ҳам иштирок этишган ва ҳамон иштирок этиб келишади. 

Келинг турли хил футбол учрашувлари натижалари-ю, барчанинг диққат-эътибори марказида турадиган кучли чемпионатлар ўйинлари ҳақида эмас, балки анчагина қизиқарли тарихга эга футбол биринчликлари ҳақида ҳам сўз юритсак. Дастлаб Осиёнинг ўртамиёна чемпионатлари қаторида эътироф этиладиган Сингапур S-Лигасига тўхталиб ўтамиз. 



Сингапурда футбол бўйича миллий чемпионат ўйинлари Осиёда биринчилар қаторида ўтказила бошланган. 1904 йилда илк Сингапур чемпионати бўлиб ўтган. Йиллар давомида бир қатор жамоалар мазкур чемпионатда қатнашишган. Аммо Сингапур миллий лигаси ҳеч ҳам қитъада етакчилар қаторига кира олмаган. Шуни инобатга олиб, Сингапур футбол ассоциацияси 1996 йилдан бошлаб янгича форматдаги лига ташкил этишга қарор қилди. Шу тариқа ҳозирги Сингапур S-Лигаси вужудга келди. 

Янгича форматдаги чемпионатга асос солинишига асосий сабаб бўлган жиҳатлардан бири Сингапурда аҳолининг футболга қизиқишини орртириш ҳамда миллий чемпионатнинг томошабоплигини ошириш орқали молиявий жиҳатдан кўпроқ фойда олиш эди. Шу сабабли S-Лига формати анчагина қизиқарли қилиб тузилди. Диққатга сазовор жиҳати шундаки, унда хорижий мамлакатлар жамоаларининг ҳам чемпионатда қатнашиши мумкин экани алоҳида қайд қилинганди. 



Натижада бир қатор хорижий клубларга таклиф билан чиқилди. Буни қараннгки, чет мамлакатларнинг баъзи бир клублари бу чорловга “Лаббай!” дея жавоб беришди. Шу тариқа “Синчи”, “Лиаонинг Гуангюан”, “Далиан Шайде” ва “Беижинг Гуоан Талент” (Хитой), “Албирекс Нигата” (Япония), “Спортинг Африка”, “Супер Редс” (Жанубий Корея), "Этоил" (Франция) ва “Бруней ДПММ” (Бруней) каби турли клублар турли йилларда Сингапур чемпионатида қатнашишди.
 
Сингапур S-Лигасида иштирок этган хорижий жамоалар:
 
Синчи (2003) Хитой
Албирекс Нигата (2004) Япония
Спортинг Африка (2006) Африка
Лиаонинг Гуангюан (2007) Хитой
Супер Редс (2007) Жанубий Корея
Далиан Шайде (2008) Хитой
Бруней ДПММ ФК (2009) Бруней
Беижинг Гуоан Талент (2010) Хитой
Этоил (2010-2011) Франция
 
Диққатга сазовор жиаҳти шундаки, Сингапур S-Лигасида айни пайтда 10 та жамоа иштирок этади. Жорий мавсумда “Албирекс Нигата” (Япония), “Бруней ДПММ ФК” (Бруней) ҳамда “Ҳаримау Муда” (Малайзия) жамоалари S-Лигада ғолиблик учун кураш олиб боришди. “Бруней ДПММ ФК” эса якунда Сингапур чемпиони номига сазовор бўлди. 

Эътиборингизга Сингапур чемпионати ва кубогида қачонлардир муваффақиятли тарзда иштирок этган хориж клублари бешталигини тақдим этамиз.
 
5. Чонбури (Тайланд)


“Чонбури” клубини бутун Осиёда билишади. Буни қарангки, Тайланднинг энг машҳур жамоаларидан бири ҳам Сингапурдан ўз омадини қидирган экан. 2006 йилги мавсумда “Чонбури” Сингапур кубогида иштирок этган. “Чонбури” ўшанда финалга қадар етиб боришни уддалаб, Сингапур кубоги финалида қатнашган илк хорижий жамоага айланганди. Ўшанда тайландликлар финалда “Тампин Роверс”га 2:3 ҳисобида ютқазиб, совринсиз қолишган. Таъкидлаш жоизки, “Чонбури” фақатгина  кубок беллашувларида иштирок этган, Сингапур S-Лигасида ўйнамаган.
 
4. Бангкок Гласс (Тайланд)


Тай ўлкасининг яна бир жамоаси “Бангкок Гласс” ҳам Сингапур кубогида иштирок этган, иштирок этганда ҳам жуда-жуда муваффақиятли қатнашган. “Бангкок Гласс” 2009 ва 2010 йилларда Сингапур кубогида қатнашиб, дастлабки уринишда финалга қадар етиб борга, иккинчи сафар эса ғолибликка эришгани диққатга сазовордир. Шундан сўнг “Бангкок Гласс” Сингапурга бошқа “қайтмади”. Клуб бу йил Тай Премьер Лигасида 6-поғонани банд этди. У 2015-йилги Осиё Чемпионлар Лигаси плей-оффида қатнашганини ҳам айтиб ўтмасак бўлмас…
 
3. Этоил (Франция) 


2010-йилги мавсумда Сингапур S-Лигасида асосан француз футболчиларидан иборат “Етоил” жамоаси иштирок этди. Ушбу жамоа илк уринишдаёқ Сингапурни забт этишга муваффақ бўлди. Ўша йилнинг ўзида “Етоил” ҳам мамлакат чемпионлигини, ҳам Лига Кубогини ютиб олишга эришди. Аммо 2011-йилги мавсум “Етоил” учун омадсиз тарзда ўтди. Шундан кейин мазкур клуб Сингапурни тарк этди. Балки у қачонлардир яна қайтар…
 
 
2. Албирекс Нигата (Япония) 


Ушбу япон жамоаси 2004 йилдан буён Сингапур миллий чемпионатида иштирок этиб келади. “Албирекс Нигата” тўлиқ япониялик футболчилардан тузилган. Жамоанинг мураббийлари ҳам доим япон мутахассислари бўлишган. Ушбу клубни Сингапур S-Лигасининг энг содиқ хорижий жамоаси, дейиш мумкин. “Нигата” сўнгги тўрт мавсумнинг 3 тасини S-Лигада учинчи бўлиб тугатди. Бу йили жамоа Сингапур кубогига ҳам эга чиқишни уддалади. Қойил қолмай илож йўқ! Шундай эмасми…
 
1. Бруней ДПММ ФК (Бруней) 


“Бруней ДПММ” жамоасини Жануби-шарқий Осиёнинг энг совриндор жамоаларидан бири, дея айтсак адашмасак керак. Зеро мазкур жамоа аслида Бруней мамалакатида тузилган. Уч уринишда икки бор мамалакат чемпионига айланган мазкур клуб 2005 йилда ўз омадини ўзга юртлардан излаш учун “йўлга чиқади”.  Дастлабки манзил – Малайзия Премьер Лигаси эди. Бу турнида ғолибликка эришган жамоа келаси мавсумдан Малайзиянинг юқори дивизиони саналган Супер Лигада иштирокни бошлайди. Дастлбки уринишда бронза медаллари қўлга киритилади. Шу тариқа “Бруней ДПММ” Малайзия Супер Лигасида ўйнай бошлайди.
Аммо 2009 йилга келиб, “Бруней ДПММ” футболчилари ва раҳбарияти Малайзиядан “зерикишган” шекилли, Сингапур чемпионатига кўчиб ўтиш истагини билдиришади. Сингапурда эса мазкур жамоа бажонудил кутиб олинади.
Илк мавсумдаёқ “Бруней ДПММ” Сингапур Лига Кубогида зафар қучади. Шундан кейин ҳам “Бруней ДПММ” Сингапурда бир неча бор муваффақиятга эришди. Жамоа 2012 ва 2014 йилларда Лига Кубоги ғолиби бўлади, мамлакат чемпионатида эса кумуш медалларга сазовор бўлади. 



2015-йилги мавсумда эса “Бруней ДПММ” узоқ йиллик меҳнат самарасини кўрди – жамоа ўз тарихида илк бор Сингапур чемпионати олтин медалларига эга чиқди!
 
Гувоҳи бўлганингиздек, Сингапур мамлакатида қисқа давр ичида бир нечта хорижий мамлакатлар жамоалари ўйнаб кетишга улгуришди. Улар орасида анчагина салмоқли натижалар қайд этганлари бўлгани эса диққатга сазовордир. 

Дунёнинг ана шундай антиқа чемпионатлари ҳақида маълумот беришда давом этамиз. Сайтимиздан узоқлашманг…