Илгари “Олмалиқ” сафидаги ўйинлари билан кўпчиликка танилган ярим ҳимоячи Санжар Шоаҳмедов ортда қолган мавсумни Тошкентнинг “Локомотив” клуби таркибида ўтказди.Таъкидлаш жоиз, 2015-йилги мавсумда Шоаҳмедов ўзини ҳар томондан намойиш эта олди ва Олий Лига-2015да 29 та учрашувда майдонга чиқиб, 14 бор рақиблар дарвозасини ишғол этишга муваффақ бўлди.

Хабар берганимиздек, иқтидорли футболчининг “Локомотив” билан шартномаси декабр якунида ўз ниҳоясига етади ва у эркин агентга айланади. Шу сабабли бир қатор жамоалар Санжар Шоаҳмедов хизматларига қизиқиш билдиришмоқда. Маҳоратли ярим ҳимоячини ўз сафига қўшиб олишни истаётган жамоалар орасида бир қатор Осиё клубларининг ҳам бор экани диққатга сазовордир.

Лекин олинган маълумотларга қараганда, “темирйўлчилар” раҳбарияти ҳам Шоаҳмедовни таркибда олиб қолишни истамоқда. Чунки “Локомотив” олдига келаси мавсумда олтин медалларга эга чиқиш вазифаси қўйилмоқда. Шу сабабли “Локо” Санжар Шоаҳмедов учун янги шартнома тайёрламоқда. Футболчининг ўзи ҳам агар янги шартнома уни қониқтирадиган бўлса, жамоадан кетмаслигини таъкидлади.