Дунёдаги аксарият терма жамоалар ўз лақабларига эга. Бу лақабларни ўша терма жамоаларнинг номлари ўрнига бемалол ишлатиш мумкин. "Скуадро Адзурра" ("мовий гвардия") деган Италия, "Қизил фурия" дейилганда Испания, "лоларанглилар" номи остида Голландияни барча тушунади. Худди шунга ўхшаш Африка ва Осиё жамоаларининг лақаблари мавжуд.

Ўзбекистон терма жамоасига нисбатан "оқ бўрилар" лақаби ишлатилишини аҳён-аҳёнда эшитиб қоламиз. Негадир бу ном бизга ярашмагандек, ёпишмагандек туюлаверади. Шу боис бўлса керак журналистлар мазкур номни кўп ҳам тилга олаверишмайди. "Бўрилар" тарихимиз, анъаналаримиз ва менталитетимизга унчалик мос эмасдек. Лекин шу пайтгача унинг ўрнини боса оладиган лақаб топилмаган.

Терма жамоамизга мос лақаб топишни мухлислар эътиборига ҳавола қилмоқчимиз. Ўзбек халқига, ўзбек спортига мос келадиган қандайдир лақаб учун сизда вариант бўлса, мазкур мурожаатнинг остига "коммент" шаклида ёзишингизни сўраймиз. Иложи бўлса, ўз вариантингизни изоҳлашга ҳам ҳаракат қилинг.

Назаримизда, шундай лақаб танлаш керакки, у тарихимизни, анъаналаримизни, ўзимизга хосликни ифодаласин ва у терма жамоамизга виқор, салобат бағишлаб турсин. Бу ном айтилганда, Ўзбекистон терма жамоаси ҳақида гап кетаётганини бутун дунё ҳис қилсин, тушунсин.

Биз энг яхши вариантларни танлаб оламиз ва бу ғояни ривожлантиришга ҳаракат қиламиз. Демак, сиздан терма жамоамизга мос номлар кутамиз. Бошладик.