Хабар берганимиздек, Жиззахнинг “Сўғдиёна” клуби янги мавсумга тайёргарликни давом эттирмоқда.
Ушбу жамоа 15 декабрда илк йиғинни бошлаганди. Машғулотлар Жиззахда олиб борилмоқда. Унда ортда қолган мавсумда жамоа таркибида ўйнаган деярли барча футболчилар иштирок этишмоқда. Фақатгина олимпия терма жамоаси йиғинида қатнашаётган Жасур Ҳакимов клуб билан бирга эмас. Таъкидлаш жоиз, агар Игорь Сергеев хориж клубларидан бирига йўл оладиган бўлса, Ҳакимов катта эҳтимол билан “Пахтакор” ихтиёрига қайтади.
Шунингдек, “Сўғдиёна” йиғинида янги номларнинг ҳам бор эканини таъкидлаш жоиз. Ўтган мавсумни “Динамо”да ўтказган ҳимоячи Акмал Холмуродов айни пайтда “Сўғдиёна” машғулотларида иштирок этмоқда. Агар унинг ҳаракатлари Даврон Файзиевга маъқул тушадиган бўлса, Холмуродов келаси мавсумда Жиззах жамоаси сафида ўйнайди.
“Сўғдиёна”нинг мазкур йиғини 27 декабрга қадар давом этади. Сўнг футболчиларга байрам муносабати билан қисқа муддатли дам берилади. Иккинчи йиғин 4 январ куни старт олади.
