Жозе Моуриньо футбол оламида ўзига хос ўринга эга. У иштирокидаги матбуот-анжуманлари ҳеч қачон зерикарли ўтмайди. Унинг нордон гаплари журналист ва мухлислар учун ёд бўлиб кетган. Бугун биз сизнинг эътиборингизга унинг қизиқарли ибораларини эмас, балки ҳаёти ва фаолиятига оид 12 маълумотни тақдим этамиз.

1. Туғилган вақти, жойи
1963 йил 26 январь куни Португалиянинг Сетубал шаҳрида туғилган.

2. Ота-онаси
Жозенинг отаси Феликс Моуриньо ҳам футболчи бўлиб, дарвозабон амплуасида “Белененсеш” ва “Витория” жамоаларида тўп сурган. Онаси Мария Жулия Моуриньо келиб чиқиши бадавлат оиладан бўлиб, касби ўқитувчи эди ва мактабда бошланғич синфларга дарс берар эди.

3. Бизнес мактабни ташлаб кетган
Онаси Жозени билим олишини истаб, уни бизнес-мактабига ўқишга киритди. Аммо Жозенинг кўнгли барибир футболда эди. У ўқишсиз ҳам пул топиш мумкинлигини онасига уқтиришга ҳаракат қиларди. Жозе бизнес-мактабни иккинчи кундаёқ ташлаб кетиб жисмоний тарбия коллежига ўқишга кирди. Бу ўқув юртини у футбол методикаси мутахассислиги билан тугатди.

4. Оддий инструктор
Моуриньо 1990 йиллар бошларида кам маош оладиган оддий футбол инструктори бўлган.

5. Бобби Робсоннинг тажимони
У машҳур мураббий Сер Бобби Робсонга таржимон бўлиб ишга кирди ва ундан мураббийлик сир-асрорларини ўргана бошлади. Жозе Робсон билан бирга “Спортинг” ва “Барселона”да иш олиб борди. Робсон 1997 йилда Каталонияни тарк этганидан сўнг, у 3 йил давомида Луи ван Гал билан бирга ишлаган.

6. Рафиқаси
Жозе рафиқаси Тами билан Сетубал шаҳрида танишган. 1989 йилда улар оила қуришган.

7. Фарзандлари
Жозе Тами 1996 йилда илк бора ота-она бўлишди. Улар қизига Матилда деб исм қўйишди. 2000 йилда мураббий иккинчи марта ота бўлди. У ўғлига Жозе исмини берди.

8. Футболчилик фаолияти
Моуриньо футболчилик фаолияти давомида 1981-1982 йилларда “Риу Аве”, 1982-1983 йилларда “Белененсиш”, 1985 йилда “Сезимбра” ва 1985-1987 йилларда “Комерсиу и Индустрия” жамоаси шарафини ҳимоя қилган. Моур 6 йиллик фаолияти давомида ўз ҳисобига 16 та гол ёздириб қўйишга муваффақ бўлган.


9. Мураббийлик фаолияти
Моуриньо 2000-йилнинг сентябридан декабригача “Бенфика”, 2001-2002 йилларда “Униан Лейрия”, 2002-2004 йилларда “Порту”, 2004-2007 йилларда “Челси”, 2008-2010 йилларда “Интер”, 2010-2013 йилларда “Реал” ва 2013-2015 йилларда яна “Челси” жамоасида мураббийлик қилган.

10. Ютуқлари
Жозе “Порту” билан икки бора Португалия чемпионлиги, бир мартадан Португалия кубоги ва суперкубоги, УЕФА кубоги ва Чемпионлар лигасида зафар қучди. “Интер”ни икки бора “А” серия чемпиони қилиб, бир мартадан Италия кубоги ва суперкубоги ҳамда Чемпионлар лигасида ғолиблик сари етаклаб келди. Мадриднинг “Реал” жамоаси Моуриньо бошчилигида бир мартадан Испания чемпионати, кубоги ва суперкубогида ғолибликни нишонлаган бўлса, “Челси”ни 3 мартадан Англия чемпионати ва лига кубогида, бир мартадан Англия кубоги ва суперкубогида чемпион қилди. Моур фаолияти давомида жами 22 та ютуққа сазовор бўлди.

10 Шахсий ютуқлар
Моуриньонинг коллекциясидан 33 та шахсий ютуқлари жой олган. У 3 бора Англия, 2 мартадан Португалия, Италия ва Испанияда йил мураббийи сифатида эътироф этилган. Шунингдек Жозе 2 бора Европанинг, бир марта жаҳоннинг энг яхши мураббийига аталган совринларга ҳам эга чиққан.

11. Статистика
Жозе жами 6 та жамоани бошқарган. У 2000-йилдан буён мураббий сифатида 765 та учрашув ўтказган. Жозенинг шогирдлари ана шу ўйинларнинг 512 тасида ғалаба нашидасини суришган бўлса, 104 беллшувда майдонни бошлари эгик ҳолда тарк этишган. Қолган 149 беллашувда Моуриньо жамоаси рақиб билан муроса кўчасини танлаган. Тўплар нисбати ҳам чакки эмас 1522:618!

12. Рекордлар
Моур футбол оламида бир нечта рекордларни ўрнатган. Унинг шогирдлари 2002-2011 йиллар давомида қаторасига 150 та уй учрашувида ютқазишмаган. Шунингдек Жозе бошқарувидаги “Порту” Португалия чемпионатида 86, “Челси” Англия чемпионатида 95, “Реал” Испания чемпионатида 100 очко тўплаб, энг кўп очко олган жамоага айланишган. Моуриньо бошқарган жамоалар Чемпионлар лигасида 8 марта ярим финалга чиқишган. Бу борада ҳам португалиялик мутахассис рекорд ўрнатган.

Фурқат Юсупов