Фарғонанинг “Нефтчи” клуби янги мавсумга ҳозирликни давом эттирмоқда.
Фарғоналиклар клуб базасида машғулотлар ўтказишмоқда. Илк йиғинни дастлаб Алексей Евстафеев ва Абдусамад Дўрмонов ўтказишаётган эди. Клуб бош мураббийи Андрей Фёдоров яқинда Москва шаҳрида “Про” лицензияси бўйича таҳсил олиб қайтди ва эндиликда у жамоа билан бирга.
“Нефтчи”га келиб қўшилганлар ҳақида гап кетганда, “Қўқон-1912” сафида порлай олган Сардор Эминовнинг фарғоналиклар ўйинчисига айланиши деярли аниқ бўлиб улгурди.
Шунингдек, “Нефтчи” бир қатор футболчилар билан хайрлашадиган ҳам бўлиб турибди. Жумладан, Шерзод Ҳакимов, Акмал Холматов, Адриан Кашкавал ҳамда Сардор Раҳмонов келаси мавсумни катта эҳтимол билан бошқа жамоада ўтказишади.
“Нефтчи”нинг илк йиғини 28 декабрга қадар давом этади. Сўнг футболчиларга Янги йил муносабати билан қисқа таътил берилади ва иккинчи йиғин Тошкетда ўтказилади.