Футболимиз ватани деб эътироф этиладиган – Қўқон шаҳрида азалдан иқтидорли футболчилар етишиб чиқиши одатга айланган. Бугунга қадар Қўқон футболи кўплаб юлдузларни тарбиялаган, десак муболаға бўлмайди. Уларнинг айримлари ҳатто Ўзбекистон миллий терма жамоаси сафида ҳам тўп суришган.
Ҳозирги кунга келиб ҳам “Қўқон-1912” сафида бир қатор маҳоратли футболчилари ҳаракат қилмоқда. Уларни том маънода Қўқон футболининг бугунги юлдузлари дейишимиз мумкин. Йиллар ўтиб, ушбу футболчилар ҳам миллий терма жамоагача бўлган йўлни босиб ўтишса ажаб эмас.
Ориф Мамажонов учун 2015 йилги мавсум жуда омадли ўтди дейишга асосимиз бор. 25 ёшли футболчи мавсум давомида 26 та учрашувда майдонга тушиб, рақиблар дарвозасини 4 марта аниқ нишонга олди. Унинг 1-турда Самарқандда “Динамо” дарвозасига киритган голини мухлислар ҳамон мароқ билан эслашади. Айнан мана шу гол “Қўқон-1912”га мавсумдаги биринчи ғалабани тақдим этганди.
Умуман олганда, йил мобайнида кўрсатган ажойиб ўйинлари орқали Ориф Мамажонов қўқонлик футбол ихлосмандларининг ёқимотойига айланди.
Баҳодир Акрамовни ҳам Қўқон футболининг бугунги юлдузи дейишимиз мумкин. Сўнгги йиллардаги ажойиб ўйинлари туфайли Акрамов асосий таркибнинг етакчи ўйинчисига айланиб бормоқда. Якунига етган мавсумда 25 ёшли ярим ҳимоячи 21 та учрашувда майдонга тушиб, икки марта рақиблар посбонларини ранжитган. У голларнинг бирини Ўзбекистон миллий терма жамоасининг асосий посбони – Лобанов дарвозасига пенальтидан киритган. Иккинчи голини эса 27-турда “Металлург” дарвозасига урган.
Айтганча, Акрамов тўп киритган баҳсларда жамоамиз бир ғалаба, бир дурангга эришган. Баҳодир Акрамов ҳам қўқонлик футбол мухлисларининг меҳрига сазовор бўла олди.
Фурқат Ҳасанбоев секин-аста ўзининг нималарга қодир эканлигини намойиш этмоқда. 23 ёшли ярим ҳимоячи якунига етган мавсумда 21 та ўйинда майдонга тушиб, 1 та гол киритишга эришди. У ягона голини Наманганда “Навбаҳор” дарвозасига киритган.
Ҳасанбоев шунингдек, ўзининг интизоми билан ҳам бошқаларга ўрнак бўлса арзийди. Ярим ҳимоячимиз майдонда 1347 дақиқада тўп сурган бўлса-да, атиги бир марта ҳакамлар томонидан огоҳлантирилган.
Юқорида тилга олиб ўтилган футболчиларимиз ўтган мавсумдаги ишончли ўйинлари туфайли қўқонлик футбол ишқибозларининг меҳрини қозона олишди. Буларни бемалол Қўқон футболининг бугунги юлдузи дейишимиз мумкин.
Ўйлаймизки, янги мавсумда ҳам бу футболчиларимиз мураббий ва мухлислар ишончини оқлаб, янада ёрқин ўйин кўрсатишади. Бунинг учун уларда имконият ҳам, иштиёқ ҳам етарли.
