Янги бошланадиган мавсумга жиддий ҳозирлик кўраётган Тошкентнинг “Локомотив” клуби бугун ўз таркибини уч нафар янги футболчи билан кучайтириб олди.

Ўзбекистон миллий терма жамоаси аъзоси Сервер Жепаров, олий лигадаги энг кучли легионерлардан бири Кахи Махарадзе ҳамда “Машъал” сафида яхши ўйин кўрсатиб келаётган иқтидорли ҳимоячи Шерзод Файзиев бугун “темирйўлчилар” билан бир йиллик шартномага имзо чекишди.

Бу футболчиларни мухлисларга ортиқча таништириб ўтиришнинг ҳожати бўлмаса керак. Хусусан, Сервер Жепаров мана бир неча йилдирки юқори савияда ўйин намойиш этиб келмоқда. Қолаверса, у миллий терма жамоамизнинг алмаштириб бўлмас ўйинчиларидан бири ҳисобланади.

Кахи Махарадзега келадиган бўлсак, грузиялик легионер Ўзбекистондаги фаолиятини илк бор айнан “Локомотив”да бошлаган бўлиб, у 2009-2010 йилги мавсумларни жамоамиз сафида ўтказган. Шундан сўнг футболчи “Пахтакор” таркибига бориб қўшилди ва кейинги йилларни пойтахтнинг бошқа бир жамоасида ўтказди. Махарадзе ўз вақтида “темирйўлчилар” таркибида 34та ўйинда майдонга тушиб, иккита гол урганди.

“Машъал” футбол академияси тарбияланувчиларидан бири Шерзод Файзиев ҳам бундан буён “темирйўлчилар” аъзоси ҳисобланади. У ҳам бир йиллик шартномага имзо чекди. 2009 йилдан бери шу вақтга қадар “Машъал” таркИбида ҳаракат қилиб келган Файзиев 1992 йилда туғилган бўлиб, бир вақтнинг ўзида ҳам ҳимоя маркази, ҳам қанот ҳимоясида ҳаракат қила олади. “Машъал”да сардорлик даражасига кўтарилган бу футболчидан ҳам умидимиз катта ва ўйлаймизки, Шерзод Файзиев “Локо”да албатта ўзини кўрсата олади. Биз “Локомотив” билан шартнома имзолаган ҳар учала футболчига ҳам омад тилаб қоламиз.