“Металлург” жамоасининг сўнгги йиллардаги тўпурари Шаҳзодбек Нурматов ўз фаолиятини мамлакатимизнинг етакчи жамоаларидан бири – “Бунёдкор”да давом эттиришни лозим топди. Пойтахтликлар таркибида сермаҳсул ҳужумчига эҳтиёж туғилганлиги боис улар Ш.Нурматов билан боғланишди ва ижобий жавобни олишди. Осиё Чемпионлари лигасида мамлакатимиз шарафини ҳимоя этиши кутилаётган клубдаги фаолиятида биз Шаҳзодга омад тилаймиз ва ўз навбатида “Металлург”даги самарали фаолияти учун миннатдорчилик билдирамиз. Ўтган мавсум Маъмур Икромов худди шу йўлни танлаганди. Гарчи “Металлург” билан хайрлашган бўлса-да, бекободликлар йил давомида Икромовга ҳам ички, ҳам халқаро майдонлардаги ўйинларида мухлислик қилишганди. Эндиликда Ш.Нурматовнинг ҳам халқаро ареналарда рақиблар дарвозасини ишғол этишини ва бутун ўзбекистонлик ишқибозларни хурсанд этишини тилаймиз. “Металлург”нинг бу йилги йиғинларида шунингдек Ш. Норбеков, А.Зиёвуддинов ҳамда М.Акбаровлар иштирок этишмаяпти. Шоҳназар келгуси фаолиятини яқин хориж – Қозоғистон чемпионатида давом эттирадиган бўлди. Алишер ҳамда Миртўра эса олий лига клубларида пайдо бўлиши кутилмоқда. Бугун эрталабдан “Металлург”футболчилари Ўзбекистон Миллий олимпия қўмитаси қошидаги тиббиёт масканида кўрикдан ўтишмоқда. Кунниг иккинчи ярмида эса футболчилар Чирчиқ шаҳрига йўл олишади ҳамда иккинчи йиғинни бошлашади.