Янги мавсумга жиддий ҳозирлик кўраётган жамоамиз машғулотларга зур бермоқда. Мурод Исмоилов бошчилигидаги мураббийлар штаби эса таркибни шакллантириш борасидаги селекция ишларини давом эттиришмоқда. Кечаги машғулотга янги футболчилар келиб қўшилди. Булар ўтган мавсумнинг иккинчи қисмини “Қўқон-1912” жамоаси сафида ўтказган Илҳом Комилов ва анчадан бери келиши кутилаётган Илдар Маматказин.
Юқорида айтиб ўтганимиздек, Илҳом Комилов ўтган йили жамоамиз сафида тўп сурган ва мухлисларда яхши таассурот қолдирган. Янги мавсумни ҳам “Қўқон-1912” жамоаси таркибида ўтказишни хоҳлаган ҳимоячи кечадан машғулотга қўшилди.
Илдар Маматказин эса ўтган мавсумни Самарқанднинг “Динамо” клубида ўтказган.
Шунингдек, “Оқ-тепа” клубининг икки футбочлиси ҳужумчи Абдул Азиз Юсупов ва ҳимоячи Зафар Қорақуловлар ҳам жамоамизнинг Тошкентдаги йиғинига қўшилишди. Юсупов ўтган мавсум биринчи лигада 17 та гол урди. Зафар Қорақулов эса “Оқ-тепа” сафида энг кўп ўйинда майдонга тушди.
Бу футболчиларнинг жамоада қолиш-қолмаслиги яқин кунларда ойдинлашади.
