Янги мавсумда Малайзия Суперлигасида бир нечта ўзбекистонлик футболчилар тўп сурадиганга ўхшайди. Зеро ўзбек трансфер бозорига қизиқиб қолган малайзияликлар бирин-кетин Олий Лигада ўйнаётган ўйинчиларни сафга қўшиб олишмоқда.

Янги йил байрами олдидан тажрибали ҳужумчи Воҳид Шодиев “Перак” жамоаси сафига бориб қўшилганди. Сўнгра маҳоратли ярим ҳимоячи Лутфулла Тўраев ҳам Малайзияга йўл олди ва “Фелда Юнайтед” клуби билан бир йилга мўлжалланган шартнома имзолади. Бугун эса Ойбек Қиличев ҳам Воҳид Шодиевнинг жамоадошига айланди ва “Перак” билан шартнома тузди.

Қизиқ жиҳати шундаки, Малайзияда янги мавсум ҳали старт олмагани боис кеча “Перак” “ПКНС” клуби билан ўртоқлик ўйини ўтказди. Мазкур баҳсда Ойбек Қиличев ҳам илк бор янги жамоаси сафида майдонга тушди. Рақиб клуб – “ПКНС” таркибида эса ўтган йили “Динамо”да ўйнаган ҳужумчи Камолиддин Мурзоев ҳаракат қилди.

Маълум бўлишича, Мурзоев “ПКНС”да кўрикдан ўтаётган экан. Ҳали мазкур клуб ўзбекистонлик ҳужумчи билан шартнома тузиб улгурмаган. Агар Мурзоев ушбу жамоа мураббийларига маъқул келса, у ҳам катта эҳтимол билан янги мавсумни Малайзия Суперлигасида ўтказади.

Биласиз, ўтган йили Малайзия Премьер Лигасида ўйнаган тажрибали ярим ҳимоячи Садриддин Абдуллаев ҳам 2016 йилни Малай Суперлигасида ўтказиши мумкин. Чунки айни дамда “Локомотив” билан бирга бўлган ўйинчига ҳам Малайзия Суперлигаси жамоаларидан таклиф бўлмоқда. Шунингдек, Алишер Шоғуломовга ҳам Малайзиядан таклиф тушмоқда.

Айни кунларда яна бир ўзбекистонлик футболчи Малайзия клубида кўрикдан ўтмоқда. Агар у ҳам кўрикни муваффақиятли ўтказа олса, янги мавсумда легионер мақомида Жануби-шарқий Осиёда тўп суради.

Кўриб турганингиздек, 2016 йилда Малайзия Суперлигасида бир нечта ҳамюртларимиз ўйнашлари эҳтимол.