Кечадан "Навбаҳор" янги мавсумга тайёргарликнинг иккинчи қисмини пойтахтда бошлаганидан хабардорсиз, албатта. Эртага жамоа йиғин доирасидаги дастлабки ўртоқлик учрашувини ўтказади. Рақиб Қаршининг "Насаф" жамоаси бўлади.

Аввал айтилганидек, Тошкентдаги йиғин мобайнида таркибга янги номлар қўшилади. Бугун таркибга асли "Олмалиқ" жамоасига тегишли бўлган дарвозабон Акмал Ортиқов қўшилди. Ортиқов ўтган мавсумнинг иккинчи ярмида "Навбаҳор" дарвозасини қўриқлаганди. Посбоннинг Тошкент вилояти жамоаси билан ўртадаги битими якунига етганлигини айтиш жоиз.

Шунингдек, Наманган футболи тарбияланувчиси саналган, олдинлари "Навбаҳор", "Машъал" жамоаларида, сўнгги йилларда эса "Бунёдкор"да тўп сурган маҳоратли ҳимоячи Хайрулла Каримов ҳам бугун жамоа сафига келиб қўшилди.

Бундан ташқари, ортда қолган мавсумни "Динамо"да ўтказган ҳимоячи Артём Филипосян бугун клубнинг пойтахтдаги вақтинчалик қароргоҳида бўлиб қайтди. Олинган маълумотларга қараганда, Филипосян ҳам янги мавсумни "лочинлар" сафида ўтказиши мумкин.

Яна шуни қўшимча қилиш керакки, клуб айни дамда бир қанча тажрибали футболчилар билан музокаралар олиб бормоқда. Эркин Жабборов, Тимур Ғаниев, Анвар Ғофуров, Баҳодир Пардаев, Александр Пишур, Артём Касьянов каби футболчилар тез кунларда жамоа сафида пайдо бўлиши мумкин. Р.Ғофуров белгиланган легионерлар лимитидан тўлиқ фойдаланиш истагида осиёлик футболчи билан ҳам музокара ўтаётганлиги ҳақида маълумотлар бор.