Бугун жамоамизнинг иккинчи йиғини бошланганига 13 кун бўлди. Бу давр оралиғида “Қўқон-1912” жамоаси иккита назорат учрашувини ўтказди. Битта ўйинда мағлубиятга учраган бўлсак, битта баҳсда ғалаба қозондик. Эртага эса Тошкентдаги йиғин чоғидаги учинчи ўртоқлик учрашувида майдонга тушамиз. Бу галги рақибимиз – “Бухоро”.

Ўтган йили мўъжиза кўрсатган бухороликлар янги мавсум арафасида таркибни кучайтиришга жиддий эътибор қаратишмоқда.

Ўз навбатида жамоамиз ҳам 2016 йилги Ўзбекистон чемпионатида муносиб иштирок этиш мақсадида тайёргарликка зўр беришмоқда. Кеча Мурод Исмоилов бошчилигидаги мураббийлар штаби икки маҳал машғулот ўтказишди.

Таркибда ҳозирча ўзгаришлар йўқ. Ғайрат Ҳасанов, Зокир Қорқулов, Илдар Маматказин каби футболчилар машғулотларда иштирок этишмоқда.

“Қўқон-1912” ҳамда “Бухоро” Олий лигада 20 бора тўқнаш келишган. Шулардан 8 тасида қўқонликлар ғолиб бўлишган, 2 та ўйинда ғолиб аниқланмаган. “Бухоро” ҳозирга қадар бу рақибни 10 марта мағлуб этган. Тўплар нисбати “Бухоро” фойдасига 40:30 ни ташкил қилмоқда. Ўзаро ўинларда “Бухоро” 32, “Қўқон-1912” эса 26 очкони қўлга киритган.

Навбатдаги учрашувда вакилларимизга омад тилаб қоламиз.