"Манчестер Юнайтед" "Реал" ярим ҳимоячиси Хамес Родригес учун яна бир таклиф билан мурожаат қилган.

Sunday Express нашрининг ёзишича, "МЮ" вакиллари мадридликлар билан ушбу 24 ёшли колумбиялик футболчи борасида музокара олиб боришмоқда. Хабарда айтилишича, "қизил иблислар" бу футболчининг трансфери учун 63 млн фунт сарфламоқчи.

Бундан олдинроқ, "Реал"нинг янги бош мураббийига айланган Зинедин Зидан қишки трансферлар вақтида жамоани ҳеч қайси футболчи тарк этмаслиги ҳақида маълум қилганди.

Қолаверса, ФИФА "Реал"га кейинги икки мавсумда янги футболчиларни рўйхатдан ўтказиш бўйича тақиқ қўллагач, "Реал" футболчи сотиш эмас, сотиб олиш билан шуғулланиши аён бўлди.

Ўтган ойнинг охирида ҳам "МЮ" ушбу футболчи учун 59 млн фунт таклиф этгани ҳақида хабар берилганди.

Маълумот учун, Родригес жорий мавсумнинг биринчи ярмида жароҳат туфайли 2 ой майдонга туша олмади ва атиги 12та ўйинда жамоасига ёрдам бера олди. У бу ўйинларда 3та гол уриб, 4та голли пас амалга оширган.