Ўзбекистон олимпия терма жамоаси ҳимоячиси Максимилиан Фомин RedPen нашрига берган интервьюсида асосли танқидни тўғри қабул қилишини айтиб ўтди.

Ўзбекистон олимпия терма жамоаси 2016 йилги U-23 Осиё чемпионатида муваффақиятсизликка учради — Рио-2016 Олимпиада йўлланмасини қўлга киритиш вазифаси билан мусобақага йўл олган ўзбекистонлик футболчилар Жанубий Корея ва Ироққа қарши дастлабки икки ўйиндан кейиноқ курашдан чиқди.

Ироққа қарши ўйиндан сўнг терма жамоа ҳимоячиси Максимилиан Фомин Facebook’даги саҳифасида бир гуруҳ ишқибозларнинг танқидига жавобан ҳақоратли пост қолдирган эди. Кейинроқ футболчи бу постини ўчириб ташлаб, қилмиши учун узр сўради. Фоминнинг ҳаракатлари юзасидан унинг онаси ҳам жамоатчиликка мурожаат қилди.

«Биз футбол ўйнай оламиз. Мусобақаларга вақт ўтказиш учун эмас, ўзимизни кўрсатиш учун, бекорга келмаганимизни исботлаш учун борамиз. Бироқ спортда ҳар доим ҳам ҳаммаси сен хоҳлаганчалик бўлавермайди», — деди Фомин.

«‘Футболчиларимиз ўйнашни хоҳламади’ деб айтаётган одамлар, эҳтимол, шунчаки спорт, футбол нималигини тушунмайдиган кишилар бўлса керак. Улар бизнинг кундалик машғулотларимиз, фаолиятимиздан бехабар. Бизнинг бутун ҳаётимиз оғир меҳнат ва мусобақадан мусобақагача, ўйиндан ўйингача бўлган тайёргарликдан иборат», — деди футболчи.