2013 йилда сэр Алекс Фергюсон “Манчестер Юнайтед” жамоасини тарк этганида “қизил иблислар” “ишонган тоғи”дан, мухлислар эса юрагининг бир парчасидан айрилди. Бошқаларни билмадиму, аммо, менинг ичимдан шундай ҳиссиёт ўтган.   Ўзимни таниганимдан буён ушбу клубга мухлислик қиламан ва айтишим мумкин-ки, “МЮ”ни буюк клуб даражасига айлантирган Алекс Фергюсон ўз “норасидаси”ни ишончсиз қўлларга топшириб қўйган экан. Аввал Дэвид Мойес, кейин эса Луи ван Гал. Бу икки мутахассис биз мухлисларни совринли ўринлар-у, чемпионлар лигасидан айирди.     “Манчестер Юнайтед”нинг сўнгги пайтларда кўрсатаётган мазмунсиз ўйинлари, очко йўқотишлари мухлисларнинг кўнглини ҳира қилиши табиий. Йиллар давомида ўз майдонида гранд жамоаларга қийинчилик билан очко берадиган “манкунианликар”, бугун кучсиз клубларга очко улашиб бермоқда. Шу ерда бир савол туғилади: ҳозирги “МЮ” топ-клуб дея аталишга лойиқми?     Майдонда ҳаракат қилаётган футболчиларга этибор беринг: Жесси Лингард, Кэмерон Бортвик-Жексон, Падди МакНейр, Андрес Перейра. Бу футболчиларнинг аксарияти эндигина 20 ёшга қадам қўйишди. Нима учун голландиялик тажрибали мутахассис буюк клубни ёш футболчилар қўлига топшириб қўймоқда. Вазият оғир, ҳар бир очко олтиндек қиммат бўлиб турган бир вақтда бундай тажрибалар ўтказиш тўғри-ми? Ахир “МЮ” ҳаваскор клуб эмас-ку!     Албатта, жароҳатлар сони ҳам оз эмас: Майкл Кэррик, Маркос Рохо, Бастиан Швайнштайгер, Эшли Янг, Антонио Валенсия, Люк Шоу... Буларнинг йўқлиги яққол сезилиб турибди, аммо, Мемфис Депай, Хуан Мата каби маҳоратли ўйинчилар заҳирада ўтириб, ёш болалар майдонда ҳаракат қилиши менинг фикримча мақсадга мувофиқ эмас. Луи ван Гал ўз ишининг устаси, ҳақиқий профессионал мураббий. Унинг бошидаги кечинмалари менга қоронғу, олиб бораётган фалсафаси эса тушунарсиз, лекин, севимли клубимнинг денгиз тубига “ғарқ бўлиши”га чидаб туриш жуда қийин. Наҳотки ван Гал ёки бошқа бир мураббий “МЮ”ни қайта чемпион қила олмаса? Қачон аввалги ҳолатимизга қайтамиз? “МЮ”нинг ҳар бир мухлиси мана шу саволларни қайта ва қайта бераётган бўлса, ажаб эмас.   Клубнинг инқироз кўчасига кириб қолганида ҳам биз мухлисларга қувонч улашадиган ягона нарса шуки, “Арсенал” “Челси”ни юта олмагани сингари, “Манчестер Юнайтед” энг омадсиз пайтида ҳам “Ливерпуль”ни мағлуб қила олади. “Ливерпуль” мухлисларини хафа қилиш ёки дилларига озор етказиш ниятим йўқ. Шунчаки, бизни хурсанд қиладиган ягона воқеа шу бўлиб қолди.     “Қизил иблислар” ҳозирда топ-клуб даражасида бўлмаслиги мумкин. Бу борада қарор чиқаришни Сизнинг ҳукмингизга ҳавола этаман, азиз мухлис. Мен эса ишонч билан айтаман-ки: “Манчестер Юнайтед” – буюк клуб ва бу унвонни ҳеч ким олиб қўя олмайди. “МЮ” қайси ўринда бўлмасин, қандай натижа кўрсатмасин, энг аянчли инқирозга учраган пайтида ҳам унга мухлислик қилишда давом этаман. Мен каби ашаддий ишқибозларга эса “Қизил иблислар”га ишонишда давом этамиз”, деб қоламан. Эсингиздан чиқарманг – We are United!   Зоҳид Акрамов