Франция олий дивизионида иштирок этувчи жамоалардан бири, "Олимпик Марсель" қозоғистонлик тадбиркор қўлига ўтиши мумкин. Бу ҳақда Ғарбдаги бир қатор нашрлар жамоанинг марҳум хўжайини бўлган Роберт Луи-Дрейфуснинг собиқ маслаҳатчиси Луис Акарьесга асосланиб, хабар тарқатишган.

"Мен харидор топдим. Лекин бу савдо амалга ошиши учун вақт керак. Томонлар музокара ўтказишмоқда. Бу борада Маргарита Луи-Дрейфуснинг ўзи қарор қабул қилиши керак. У якуний қарорни эълон қилишдан олдин мени хабардор қилса керак. Ҳеч ким соғин сигир бўлишни истамайди. Жамоани сотиб юбориш ҳам осон иш эмас", дейди манба.

Унинг қўшимча қилишича, жамоага талабгорлар орасида Кувайт ва Хитой вакиллари ҳам бор.

Таниқли спорт журналисти Пьер Менезнинг қайд этишича, жамоани сотиш бўйича музокаралар қарийб 10 йилдан буён ўтказилиб келинмоқда.

"Луи-Дрейфусда ҳам жамоани сотиш фикри бўлганди. Унинг бевасининг нияти ҳақида билмайман. У жамоани сотишга мажбур эмас. Балки, у марҳум турмуш ўртоғининг хотираси ҳаққи жамоани олиб қолишни истар... "Марсель"нинг сотилиши ҳақида анча вақтдан буён миш-мишлар бўлиб келади. Лекин муносиб харидор топилсагина, жамоани сотса бўлади", дейди Менез.

Баъзи нашрларда қайд этилишича, жамоанинг нархи 100 млн евро атрофида.