Сўнгги йилларда Нукуснинг "Орол" жамоасида молиявий муаммолар сабабли, мазмунли иштирок эта олмаяпти. Шунга қарамай, жамоа мавсумни кўнгилдагидек ўтказишга ҳаракат қилмоқда. Ҳозирда қуйи лига жамоалари мавсумга тайёргарликни бошлаб юборишган. "Орол"да ҳозирча ҳеч қандай янгилик йўқ. Бунга ойдинлик киритиш истагида "Орол" устози Неъматилло Қуттибоев билан суҳбатлашдик.
- Февралдан бошлаб янги мавсумга тайёргарликни бошламоқчимиз. Ҳозирда айрим муаммоларни бартараф қилиш устида ишламоқдамиз. Албатта, барчаси молиявий муаммоларга бориб тақалади. Ишонаманки, йиғинлар бошланишига қадар барчасини ижобий ҳал бўлади.
- Умуман олганда, жамоа биринчи лигада иштирок этиши маълум бўлдими?
- Албатта, иштирок этамиз. Бу борада гап-сўз бўлиши мумкин эмас. Насиб қилса, яқин кунларда албатта йиғинни бошлаб юборамиз ва ҳаммаси жойига тушади.
- Жорий йилдан биринчи лига форматига ўзгариш киритилди. Бу регламент сизга манзур бўлдими?
- Бу қарорни маъқуллайман. Негаки, ўтган йилларда битта сафарда ўйнаганингиздан кейин қисқа вақт ичида уйда тўп суришга тўғри келади. Масалан, Фарғонада сафар ўйнадик. Уч кундан сўнг уйда тўп суришимизга тўғри келади. Мана шундай ҳолат сабабли, молиявий муаммоларимиз кўпайиб кетди. Футболчиларда чарчоқ аломатлари сезилиб қолди. Регламентга ўзгариш киритилгани эса бироз жамоаларнинг чарчоқ аломатлари сезилиб қолмаслигини билдиради.