Бугун пойтахтда тайёргарлик кўраётган “Бухоро” жамоаси “Пахтакор”га қарши назорат учрашуви ўтказди. Мазкур баҳсда “шерлар” кичик 1:0 ҳисобида ғалаба қозонди. Учрашувдан кейин “Бухоро” бош мураббийи Жамшид Саидов билан суҳбатлашдик.
- Бугун навбатдаги йиғин якунлари олдидан сўнгги назорат учрашуви эди. Шу боисдан футболчиларга имконият бердик. Асосийси, уларнинг имкониятларини яна бир маротаба синовдан ўтказдик. Айтиш керакки, улар ёмон ҳаракат қилишмади. Назорат учрашувларида натижадан кўра, ўйинчиларнинг амалиётга эга бўлишлари муҳим ҳисобланади.
- Клубда кўрикда бўлган Саҳоб Жўраев нима учун “Бухоро”да қолмади?
- Ҳозирда жамоамизда қатор футболчиларни қўшиб олдик. Шу боисдан айрим ўйинчиларга жавоб бердик. Саҳоб Жўраев, Маъруф Муродов, Отабек Нарзуллаевлар тарк этишди. Албатта, бу футболчилар заҳирада ўтиришлари керак эмас. Шуни инобатга олиб, жавоб бердик.
- Ҳужумчи Алишер Шоғуломовни тақдири нима бўлди?
- Ҳали олдинда йиғинларимиз кутиб турибди. Шоғуломов мазкур йиғинларда ўзини кўрсата олса, албатта жамоада қолади.
