Хабар берганимиздек, Тошкентнинг “Бунёдкор” жамоаси янги мавсум олдидан таркибга қўшиб олган янги ўйинчиларининг таништирув маросимини ўтказди.
Мазкур тақдимот маросимидан кейин жамоанинг янги аъзоси Шаҳзодбек Нурматов билан қисқача суҳбатлашдик.
- Янги жамоадаги илк таассуротларингиз билан ўртоқлашсангиз…
- “Бунёдкор” – ажойиб жамоа. Таркибда маҳоратли футболчилар йиғилган. Жамоанинг инфратузилмаси, машғулотлар ўтказилиш жараёни-ю ўйинларга кўриладиган тайёргаликка гап йўқ. Ушбу жамоага тез киришиб кета олганимдан хурсандман. Айниқса, илк ўртоқлик ўйинидаёқ тўп кирита олганим ўзимга бўлган ишончни оширди, деб ўйлайман.
- Б. Бобоев таъкидлаганидек, “Бунёдкор”нинг ҳар бир чизиғи кучайтирилмоқда ва ўйинчиларга асосий таркибга кириш осон бўлмайди. Сиз рақобатдан қўрқмаяпсизми?
- Асло, йўқ! Билсангиз, менга рақобат ёқади. Қаерда рақобат бор бўлса, ўша ерда ўсиш бўлади, деб бежизга айтишмайди. Мен ҳам бор куч-ғайратимни ишга солган ҳолда асосий таркиб аъзосига айланишга ҳаракат қиламан. Ўйлашимча, буни уддалай оламан.
- Сиз ўзингиз ҳужумчи сифатида янги мавсумда нечта гол киритишни мақсад қилдингиз?
- “Бунёдкор” ўз олдига юқори мақсадларни қўяди. Жамоа янги мавсумда чемпионликка эришишни мақсад қилган. Мен ҳам ўз киритадиган голларим билан жамоамнинг олтин медалларга эга чиқишига хисса қўшмоқчиман. Насиб этса, Олий Лига тўпурари бўлишни ният қилаяпман.
Бекзод Исаев суҳбатлашди
