Хитойнинг «Шанхай Ист Эйша» жамоаси Аргентинанинг «Бока Хуниорс» жамоаси билан Карлос Тевесни трансфер қилиш хусусида музокара олиб борган. Бу ҳақда Ole нашрида ёзилган.
Шанхайликларни айни вақтда швециялик таниқли мутахассис Свен-Йоран Эрикссон бошқармоқда. Жамоа раҳбарияти эса ОЧЛда муносиб иштирок этиш учун таркибни кучайтиришга ҳаракат қилмоқда. Шу мақсадда таркибга Асамоа Гьян ва Элкесон каби легионерлар жалб этилган ва бу трансферлар учун 25 млн евродан ортиқ маблағ сарфланган.
Хитойликлар жамоаси Тевесга 22,5 млн евро маош тўлашни назарда тутувчи бир йиллик шартнома таклиф қилган. Лекин у бу таклифни рад этган. У «Бока Хуниорс»га содиқлигини, айнан шу жамоада ўйнашни истагани учун Европани ташлаб келганини билдирган.
Жорий мавсумда Тевес ўзини тарбиялаган бу жамоа сафида 12та ўйин ўтказган ва 5та гол уриб, 4та сариқ карточка ишлаган.
