Бекободнинг “Металлург” жамоаси сафида сўнгги мавсумда ёрқин ўйин кўрсатган ёш ҳужумчи Шоҳназар Норбеков Қозоғистоннинг “Акжайик” жамоаси кўригида қатнашаётгани ҳақида хабар берган эдик.
Истеъдодли футболчи қозоқ клубининг 5-21 январ кунлари Туркиянинг Белек шаҳрида ўтган мавсумолди илк йиғинида қатнашган эди. Эндиликда Урал жамоаси иккинчи йиғинни ҳам Белекда олиб бормоқда. 1 февралдан бошланган машғулотлар 28 февралга қадар давом этади. Ҳамюртимиз ҳам ушбу жамоа билан биргаликда шуғулланмоқда.
Қозоғистон Премьер Лигасининг янги аъзоси саналадиган “Акжайик” Туркия йиғини чоғида 4 та ўртоқлик ўйини ўтказишга улгурди. Жамоа Норвегиянинг “Асан Футбол” (3:0), Болгариянинг “Берое” (0:2), Руминиянинг “Газ Метан” (0:1) ҳамда “Тиргу-Муреш” (0:1) клублари билан синов-назорат баҳсларида куч синашди. Шоҳназар Норбеков ҳам ушбу ўйинларда майдонга тушди. Эртага “Акжайик” Молдавиянинг “Заря” жамоаси билан ўйнайди.
Таъкидлаш жоиз, ўтган мавсумда “Олмалиқ” жамоаси сафида тўп сурган сербиялик ҳужумчи Неманья Йованович ҳам айни пайтда “Акжайик” йиғинида бўлиб турибди.
