Бундеслига тарихидаги энг ёш мураббий. 28 ёшли Юлиан Нагельсманн «Хоффенхайм»нинг янги бош мураббийига айланди. Унинг клуб бошқарувини ўз қўлига олиши ўтган йилиёқ маълум қилинганди. Лекин ёш мутахассис янги вазифага июнь ойи охирида, яъни жорий мавсум тугаганидан сўнг киришиши лозим эди. Бироқ чемпионатнинг дастлабки 20та ўйинида атиги 14 очко олингач, жамоанинг амалдаги мураббийи Хуб Стевенс саломатлигига боғлиқ муаммоларни рўкач қилиб, истеъфога чиқди. Натижада «Хоффенхайм» раҳбарияти 28 ёшли Нагельсманнга ҳозирнинг ўзида таянишдан бошқа чора тополмади. Хуллас, қуйида FootballHD.ru сайти маълумотлари асосида бундеслига тарихидаги ёш рекордчи билан танишамиз.
Умумий манзара
Бунгача 39 ёшли Пала Дардеи («Герта» устози) Германия чемпионатининг жорий мавсумидаги энг ёш бош мураббий саналарди. Эътибор беринг, Нагельсманн ундан нақ 11 ёш кичик. Умуман, «Хоффенхайм»нинг янги коучи бутун бундеслига рекордини янгилади. Бу борадаги рекорд 1970 йили 30 ёшу 244 кунлигида «Гамбург» бошқарувини қўлга олган Клаус-Дитер Оксга тегишли эди. 1988 йили «Санкт-Паули»га устозлик қилган Хельмут Шульт эса бу рекордни янгилашга атиги 50 кун кечиккан. Яъни у жамоани бошқара бошлаган пайт 30 ёшу 294 кунлик бўлган.
Агар АПЛга назар солсак, унинг тарихидаги энг ёш мураббий мақоми Аттило Ломбардога тегишли. Энг қизиғи, 32 ёшу 67 кунлигида бир неча тур давомида «Кристал Пэлас»ни ўйновчи-мураббий ролида бошқарган италиялик фахрий яна бир йилдан сўнг «Лацио»нинг тўлақонли аъзоси сифатида чемпионликни тантана қилган. АПЛ тарихидаги энг ёш мураббийлар рўйхатида Ломбардо ортидан Крис Коулмэн («Фулхэм», 32 ёшу 313 кунлик), Жанлука Виалли («Челси», 33 ёшу 227 кунлик) ва Андре Виллаш-Боаш («Челси», 33 ёшу 301 кунлик) боришяпти.
Юлиан Нагельсманн - у ким?
Юлиан 10 йилча олдин Германия футболидаги энг истиқболи ёш марказий ҳимоячилардан бири саналган. Ўшанда у «Мюнхен 1860»нинг ёшлар жамоасида ўйнарди. Учрашувлардан бирида навбатдаги тўқнашувдан сўнг ёш ҳимоячи ноқулай йиқилади ва майдонни шифокорлар замбилида тарк этади. Гарчи Юлиан зудлик билан операция столига ётқизилган бўлсада, жарроҳлик амалиёти натижа бермайди. Иккинчи операция муваффақиятли чиқишига қарамай, шифокорлар унга фаолиятини давом эттирмасликни тавсия этишади. «Мюнхен 1860» ўша вақт майдонга тушмайдиган футболчини ўз таркибида олиб юриш учун ортиқча маблағга эга эмасди. Хуллас, клуб Нагельсманндан воз кечади. Кейинроқ Юлиан футболдаги бахтини «Аугсбург» ёшлар жамоасида топишга уринади. Афсуски, илк машғулотлардаёқ жароҳатланган тиззасида кучли оғриқ сезади. Натижада 20 ёшли йигит мураккаб ҳолатда қолади. Яъни унинг олдида 2та йўл бор эди: ҳали тузукроқ бошланмаган фаолиятига нуқта қўйиш ёки ногирон бўлиб қолиш хавфига қарамай, ўйнашда давом этиш. Ана шу қийин танлов чоғи «Боруссия» (Дортмунд)нинг ҳозирги устози Томас Тухель катта роль ўйнайди. «Аугсбург» ёшларини айнан у шуғуллантирарди ва Юлианга ўз ёрдамчиси бўлишни таклиф қилади. Чунончи, Тухелнинг ўзи ҳам жароҳат сабаб, 25 ёшида бутсаларини михга илишдан ўзга чора тополмаганди. Демак, у ёш йигитнинг ҳолатини жуда яхши тушунган. Шундай қилиб, Тухель янги ассистентига «Аугсбург»нинг бўлажак рақиблари ўйинларини таҳлил этиш вазифасини топширади. Ўз навбатида, Юлиан бу ишни яхши бажаради. Ҳарқалай, «Аугсбург» мавсумда ёмон ўйнамайди, якунда Тухелни «Майнц»га таклиф этишади. Нагельсманн эса жанажон клуби - «Мюнхен 1860»га йўл олади. У жамоада собиқ мураббийига яқиндан ёрдам бериш баробарида ўзи тенги йигитлар даврасида тажриба тўплайди.
Кейинроқ Юлианни «Хоффенхайм»га чақиришди. Истиқболли мураббийга клуб хўжайини Дитмар Хоппнинг шахсан ўзи эътибор қаратганди. Табиийки, Нагельсманн бундеслига клуби академиясида ишлаш имкониятига жиддий қаради. Мана, у 5 йил ичида U-17 тоифасидаги жамоа устози ёрдамчисидан асосий таркибнинг бош мураббийигача бўлган йўлни босиб ўтди. Аслида бундей сценарий кузатилмаслиги ҳам мумкин эди: Германия ОАВ маълумотларига кўра, аввалги ёз Юлиан «Бавария»нинг ёшлар жамоасини бошқариш хусусидаги таклифини рад этган. Ҳаттоки, устакор Ули Хёнесснинг «Бавария» Нагельсманн тимсолида истиқболли мураббийни кўраётгани ҳақидаги гаплари ҳам унинг «Хоффенхайм»да қолиш иштиёқига таъсир қилгани йўқ.
Эндиги вазифаси
Нагельсманн олдида қолган ўйинларда ижобий натижа кўрсатиб, «Хоффенхайм»ни иккинчи бундеслигага тушиб кетишдан қутқариш вазифаси турибди. Лекин агарда қутқарувчилик миссияси бажарилмаса ҳам, Юлиан ўз жойини йўқотмайди. Зеро, ўртадаги шартнома 2019 йилгача мўлжалланган. Шу ҳам клуб раҳбариятининг ёш мутахассисга тўла ишонч билдираётганидан далолат. Иккинчи томондан олсак, «Хоффенхайм»ни бундеслигада олиб қолиш вазифаси Нагельсманн учун мутлақо янги ҳаётий ҳолатдир. Эътиборлиси, асосий таркибда Юлиандан ёши катта футболчилар ҳам бор: Александр Штольц (33 ёш), Ойген Полянски (29 ёш), Кай Хердлинг (31 ёш), Кевин Кураньи (33 ёш). Хўш, Нагельсманн шундай тажрибали йигитлар орасида талаб даражасида обрў орттира оладими? Футболчилар уни қандай қабул қилишади? Бир нарса дейиш қийин. Ҳаммаси вақт ҳукмидаги масала. Лекин бир нарса кишини хурсанд қилади: 18 ёшида футболчилик фаолиятини мажбуран тўхтатган иродали йигит яна 10 йилдан сўнг бундеслигадек турнирда энг ёш мураббийга айланиб, ўз номини севимли ўйини тарихига ёзишни уддалади.
P.S.: Юлиан Нагельсманн дебют ўйинида «Хоффенхайм»ни меҳмонда «Вердер» билан дуранг ўйнаши (1:1)ни таъминлади.
И.РАҲИМОВ тайёрлади
