«Реал» клуби собиқ бош мураббийи Рафаэль Бенитес ўзининг истеъфоси борасида фикрларини билдириб ўтди.
«Буни тушунтириш қийин. Сўнгги йилларда "Реал"да нималар содир бўлаётганини тушунишингиз керак. Жамоада Камачо, дель Боске, Пеллегрини, Моуриньо ва Анчелотти ишлади. Бу ерда мураббий сифатида ишлаш осон эмас. Ишингиз идеал даражада бўлиши лозим.
Ишингиз режадан бироз четлашса ёки раҳбариятга шундай туюлса, сизда муаммолар бошланади. Мен ўз вазифамни яхши бажардим деб ҳисоблайман ва шундай руҳда давом этишимиз мумкин эди, аммо ўйинчилар, мухлислар ва клуб президенти асабийлаша бошлашди. Натижада мураббий алмаштирилди.
Қарорларнинг узвийлиги — муваффақиятлар калити. Испания чемпионатида "Барселона"га қарши курашишингизга тўғри келади. Бу жамоанинг ўз ўйин услуби ва модели бор. "Реал" эса ҳар йили мураббийни алмаштиради ва барчасини бошидан бошлайди. Мана, нима учун "Барселона" сўнгги 7та чемпионатнинг бештасида ғолибликни қўлга киритган. Мадрид жамоалари эса бир мартадан чемпион бўлишди.
Каталонияликлар сўнгги 8 йилнинг олтитасида Испания кубоги финалига чиқишди ва "Реал"га нисбатан Кубокни икки баравар кўп қўлга киритди. Ўйлайманки, барча нарса узвийликда.
Флорентино Перес бизнес борасида ажойиб ишни амалга оширди. Боиси, "Реал" бизнес-лойиҳа сифатида ривожланиб бориши керак. Бу амалга ошяпти. Футбол нуқтаи назаридан мадридликларнинг муаммоси шундан иборатки, "Барселона" ҳар йили совринларни кўпроқ қўлга киритиб бораверади», — дейди Бенитес.