Осиё чемпионлар лигасининг 1-тури доирасида бўлиб ўтган "Локомотив" ва "Ал-Иттиҳод" жамоалари ўртасидаги учрашувдан сўнг матбуот анжумани ташкил этилди. Унда дастлаб меҳмонлар бош мураббийи Виктор Пицуркэ иштирок этди.

— Кутганимдек, қийин ўйин бўлди. Биринчи бўлим гол уришга муваффақ бўлдик ва ушбу ҳисобни сақлаб қолишимиз керак эди. Аммо ўйинни эрта ташлаб юбордик. Натижада ғалабани қўлдан чиқардик. Ўйин сўнгида юзага келган ҳодиса учун барчадан узр сўрайман. Бу футбол. Футбол тоза ўйналиши керак. Сафарда қўлга киритилган бир очко биз учун ижобий натижа.

— Юзага келган вазият клубда муҳокама қилинадими?
— Ушбу вазиятни футболчилар билан биргаликда муҳокама қиламиз ва бундай ҳолатнинг қайта такрорланмаслигини олдини оламиз. Футболчилар профессионал бўлиши керак ва ўзларини муносиб тарзда тутишлари керак.

— Европалик мутахассис сифатида айтингчи, араб футболчиларининг вақт чўзиш мақсадида ётиб олишларига муносабатингиз.
— Мен бу саволга жавоб бериб бўлдим деб ўйлайман. Бугунги ўйин менга ёқмади. Аминманки, футболчиларим бундай ҳолатни бошқа такрорлашмайди. Одатда саудиялик футболчилар вақт чўзишга ҳаракат қилишмайди. Улар ростдан ҳам жароҳат олишгани учун майдонда ётишди. "Локомотив" ўйинчилари ҳам жароҳат олишганида шифокорлар уларга кўп вақт сарфлашди.

— Мунтарий 90 дақиқа ўйнашга тайёр эмасдими?
— Унинг жисмоний ҳолати яхши, бугун у тиззасидан жароҳат олгани учун муддатидан аввал алмаштиришга мажбур бўлдим.

— "Локомотив" сиз кутган ўйинни намойиш қила олдими?
— Ҳа, "Локомотив" айнан мен кутган ўйинни намойиш қилди.