Мюнхеннинг "Бавария" клуби ҳимоячиси Филипп Лам жаҳоннинг энг кучли ҳимоячиларидан бири саналади. У бугун ЕЧЛ-2016 1/8 финалида "Ювентус"га қарши баҳсда ўзига хос янги рекорд қайд этиши мумкин.

Гап шундаки, аввалроқ германиялик футболчи худди Италия термасининг собиқ ҳимоячиси Алессандро Неста сингари ушбу турнирда 99 ўйинда гол ура олмай келаётган эди. Агар бугунги баҳсда ҳам гол уришнинг уддасидан чиқа олмаса, рекордчи сифатида тарихга киради.

Бундан ташқари у Оливер Кан ва Хаби Алонсодан кейин ЕЧЛда 100 учрашувдан кўп ўйин ўтказган "Бавария"нинг учинчи футболчисига айланади.

– Ўйинолди таассуротлар кўп. Мен собиқ жамоадошим Марио Манжукич билан яна учрашаман. Биз у билан Мюнхенда ажойиб дамларни ўтказганмиз. У учта кубокни ютишимизда муҳим ўйинчилардан бири бўлган. Шунинг учун у билан яна кўришишимдан хурсандман. Уни жуда ҳурмат қиламан, – дейди Лам ўйинолди матбуот анжуманида.

Эслатиб ўтамиз, "Ювентус" - "Бавария" учрашуви бугун тунда Тошкент вақти билан 00:45да бошланади.