Шанба оқшомида ҳамюртимиз Руслан Чагаев ўзига тегишли бўлган супероғир вазн тоифасидаги WBA (Regular) чемпионлик камарини австралиялик Лукас Браунга бой бериб қўйганди. Жангнинг 10-раунди якунланиб бораётган бир пайтда Брауннинг ўнг қўлда берган кучли зарбасидан сўнг Руслан мувозанатини йўқотиб қўйган эди.

Жангни бошқариб борган тажрибали жанубий африкалик рефери, шу йил январь ойида 72 ёшини қаршилаган Стэнли Христодулу Лукаснинг кетма-кет берган зарбаларидан сўнг баҳсни тўхтатганди. Ўша пайтда раунд якунланишига 40 сония вақт қолганди.   

“Қарорим юзасидан баҳслашиш бефойда. Барчаси мавжуд қоидалар асосида амалга оширилди. Чагаев икикта жуда кучли зарба ўтказиб юборди. Бу зарбалардан сўнг у жангни давом эттира олмасди. Мени ўрнимда бошқа рефери бўлганида ҳам шундай йўл тутарди. Бу стандарт техник нокаут”, – деди Христодулу.

Эслатиб ўтамиз, Руслан Чагаевнинг жамоаси ҳакамнинг 10-раундидаги қарори юзасидан апелляция беришни мақсад қилган.