Олий Лиганинг 2-тур учрашувидан ўрин олган “Андижон” – “Локомотив” баҳси бўлиб ўтди. Унда тошкентликлар 3:1 ҳисобидаги ғалабани танътана қилишди.
Учрашувдан сўнг ташкил этилган матбуот анжуманида дастлаб “Локомотив” устози Андрей Микляев журналистларнинг саволларига жавоб қайтарди.
"3:1 ҳисобида ғалаба қозонган бўлсак-да, баҳс биз учун осон ўтмади. Боиси рақиб ҳам бугун яхши ўйин намойиш этди. Аммо шогирдларим ҳам бугун фақат ғалаба учун ҳаракат қилишди ва якунда ўз мақсадимизга ета олдик. Дастлабки 2 та турда Водийнинг икки жамоаси билан баҳсда 6 очко ишлашни мақсад қилгандик. Вазифа бажарилди. Бунинг учун йигитлардан миннатдорман.
Биз учун тақвим унчалик ҳам кўнгилдагидек тузилмаган. Ҳозир 2 та ўйин сафарда ўйнадик. Энди Осиё Чемпионлар Лигасида ҳам сафарда ўйин ўтказамиз. Лекин кишини хурсанд қиладиган жиҳати шундаки, ўйинчиларимиз ушбу муҳим ўйинларда ўзларини ижобий жиҳатдан кўрсата олишмоқда. Учрашувларда ғалаба қўлга киритилмоқда. Бу йил жамоамизда ажойиб таркиб йиғилган. Умид қиламанки, бу йил кўплаб ғалабалар қўлга киритиб, мухлисларимизни хурсанд қиламиз", - дейди тажрибали мутахассис.