Бугундан бошлаб Ғафур Ғулом номидаги нашриёт-матбаа ижодий уйи томонидан Ўзбекистон миллий терма жамоаси ҳақида тайёрланган «Бир жамоа — бир орзу» номли китоб савдоси «Бунёдкор» стадионида йўлга қўйилди.
Маълумки, бугун пойтахтимизнинг етакчи жамоаси «Бунёдкор» футболчилари Осиё чемпионлар лигаси-2016, гуруҳ босқичи, учинчи тур ўйинлари доирасида Эроннинг «Зоб-Аҳан» жамоаси билан куч синашишади.
Сал кейинроқ март ойида Ўзбекистон миллий терма жамоасининг Жаҳон чемпионати 2018, иккинчи саралаш босқичи доирасидаги сўнгги икки ўйинни Тошкентдаги “Бунёдкор” стадионида ўтказади.
Ўзбекистон миллий терма жамоасининг 24 март куни бўлиб ўтадиган Филиппинга қарши учрашуви ҳам, Баҳрайнга қарши 29 март куни бўладиган ўйин ҳам 18:00да старт олади.
Эслатиб ўтамиз, сўнгги икки ўйин олдидан Ўзбекистон терма жамоаси олти учрашув ўтказиб, 15 очко тўплаган ҳолда гуруҳда иккинчи ўринни эгаллаб турибди. Гуруҳда ҳозирча 7 учрашувда 16 очко жамғарган КХДР терма жамоаси пешқадамлик қилмоқда.
Ўйлаймизки, Ғафур Ғулом номидаги нашриёт-матбаа ижодий уйи томонидан Ўзбекистон терма жамоаси ҳақида чиқарилган илк китоб футболчиларимизни янги ғалабаларга руҳлантириб, миллионлаб ўзбек футболи мухлисларига чинакам туҳфа бўлиб қолади.
