Март ойининг ярми ҳам ортда қолди. Ана шу 15 кун мобайнида Европада бир қанча рекорд ва антирекордлар қайд этилди. Биз ана шундай рекордларнинг 8 таси ҳақида тўхталиб ўтишни жоиз деб топдик. 

 
1. ПСЖдан рекорд 
Франция чемпионатининг 30-турида “ПСЖ” сафарда “Труа” меҳмони бўлди ва “кичик” 9:0 ҳисобида ғалаба қозонди. Шу тариқа Парижликлар чемпионат тугашига 8 тур қолганида мамлакат чемпионлигини нишонлашди. Бундан олдин Лига1 да ҳеч қайси жамоа шунча тур олдин чемпионликни расмийлаштира олмаган эди. 

 
2. “Ювентус”дан рекорд 
Туриннинг “Ювентус” жамоаси Италия чемпионатининг 28-турида “Сассуола” жамоасини 1:0 ҳисобида таслим этди. “Кекса синьори” Италия чемпионатида гол ўтказиб юбормаслик борасида “Интер”нинг рекордини янгилади. “Юве” “А” серияда қаторасига 10 та ўйинда гол қўйиб юбормади.  

 
3. “Барселона”дан рекорд 
Испания чемпионатининг 27-турида “Райо Валекано”дан устун келган Каталониянинг “Барселона” жамоаси мағлубиятсиз ўйинлари сонини 35 тага етказиб олди ва бу борада “Реал” томонидан ўрнатилган рекордни янгилади. Луис Энрике шогирдлари охирги марта 2015 йилнинг октябр ойида “Севилья”га мағлуб бўлишган эди. 

 
4. Роналдунинг рекорди 
Криштиану “Рома”га қарши Чемпионлар лигасининг нимчорак финалида майдонга тушиб, ўз ҳисобига гол ҳам ёзидириб қўйганди. Шу тариқа Роналду Чеммпионлар лигаси плей-офф баҳсларида энг кўп майдонга тушган футболчига айланди. “Реал”нинг “7” рақамли футболчиси турнир плей-оффида 57-учрашувини ўтказиб, Хавининг (56 ўйин) рекордини янгилади. 

 
5. Мессидан рекорд 
Лео Испания чемпионатида “Эйбар”га қарши беллашувда “дубл” қайд этиб, ушбу мавсумда Ла Лигада урган голлари сонини 21 тага етказиб олди. Шу тариқа Месси Испания чемпионати тарихида 8 мавсум 20 та ва ундан ортиқ гол урган, биринчи футболчи сифатида тарих саҳифаларидан ўрин олди. 

 
6. Мессидан антирекорд 
“Барселона” ҳужумчиси Лионель Месси “Хетафе”га қарши учрашувнинг 10 дақиқасида пенальтини кўкка совурди. Натижада Лео “Барселона” футболчилари орасида голга айлантирилмаган пенальтилар сони бўйича рекордчига айланди. У Каталонияликлар либосида 8 марта 11 метрлик “нуқта”дан адашган. Олдинги рекорд Самуэл Это’Ога (7 ноаниқ пенальти) тегишли эди. 

 
7. Роналдудан антирекорд 
Мессининг антирекордини эшитган Роналду яна у билан рақобатга киришди ва ўзининг шахсий антирекордини ўрнатди. Гап шундаки Криш Ла Лиганинг 29-турида “Лас Палмас”га қарши ўйинда тўпни бор йўғи 28 марта қабул қилиб, “рекорд” қўйди. Унинг аввалги ёмон натижаси 38 тани ташкил этарди. Ҳа бу икки футболчи бир-бири билан ҳар қандай йўналишда ҳам рақобатлаша олишади. 

 
8. Писарродан рекорд 
“Вердер” ҳужумчиси Клаудио Писарро “Байер”га қарши ўйинда “хет-трик”ка эришди. Тажрибали ҳужумчи бу пайтда 37 ёш-у 5 ойлик эди. Бу орқали Писарро Бундеслига тарихида “хет-трик” қилган энг қария футболчига айланди. 

Фурқат Юсупов