Қатар Юлдузлар лигасида 23-тур учрашувлари старт олганидан хабарингиз бор.

Тур доирасидан ўрин олган “Ал-Вакра” – “Умм Салал” учрашувида “Салал” ҳамюртимиз Санжар Турсуновнинг голли пасидан сўнг кичик ҳисобда ғалабага эришгани ҳақида маълумот берган эдик. Миллий терма жамоамиз ярим ҳимоячиси бугундан бош жамоамизнинг Тошкентдаги йиғинига етиб келди. Турсунов бугун “Жар” стадионида ўтадиган машғулотда иштирок этади.

Ўзбекистон термасининг яна бир етакчиси – Сардор Рашидов фаолият олиб бораётган “Ал-Жаиш” клуби эса Юлдузлар лигаси 23-тур доирасидаги ўйинини бугун Лига етакчиси – “Ар-Райян”га қарши ўтказади. Мазкур ўйин сўзсиз, турнинг марказий матчидир. Зеро, “Райян” аллақачон муддатидан аввал чемпионлик масаласини ҳал этиб улгурган. “Жаиш” эса кумуш медаллар учун баҳс олиб бормоқда.

Ҳа айтганча, “Ал Жаиш”нинг медаллар учун рақобатчилари – “Лахвия” ҳамда “Ас-Садд” ҳам бугун ўзаро ҳисоб-китоб қилишади.

“Ал-Жаиш” – “Ар-Райян” ўйинидан сўнг миллий терма жамоамиз аъзоси Сардор Рашидов Тошкент томон йўлга чиқади ва бош жамоамиз йиғинига келиб қўшилади.