“Қизилқум” — “Орол” жамоалари учрашуви (5:0) якунлангач, матбуот анжумани иккинчи қисмида меҳмонлар ўйновчи — бош мураббийи Тимур Турдиев қатнашди.
— “Қизилқум” жамоасини кейинги босқичга йўлланма олгани билан табриклайман, — деди Тимур Турдиев. — Олий ва биринчи лига жамоалари имкониятини тенглаштириб бўлмайди. Рақиб жамоа таркибида юқори савиядаги легионерлар тўп суради. “Қизилқум” бежизга чемпионатни ғалабалар билан бошламаганлиги кўриниб турибди.
Албатта, рақибимиз маҳорат бобида биздан кучли эканлигини билардик. Аммо, бугун бу қадар йирик ҳисобда мағлубиятга учраймиз, деб кутмагандик. Таркибимизда асосан маҳаллий ёшлар ўйнайди. Бугунги улар учун ўз имкониятларини синовдан ўтказиб олишлари учун алоҳида мактаб бўлди, деб ўйлайман.
Навоийда футбол ўйнаганман. Шу учун бу ерда футболни қанчалик яхши кўришларини аввалдан биламан. Очиғи, “Ёшлар” спорт мажмуасида халқаро андозаларга мос шарт-шароитлар яратилганини кўриб роса хурсанд бўлдим.
Қорақалпоғистонда ҳам йилдан йилга футболни ривожлантиришга эътибор кучайиб боряпти. Албатта, жамоамиз олий лигада ўйнашини жуда истаймиз. Бунинг учун бироз вақт керак. “Хоразм” жамоаси билан ўйиндан кейин стадионимизда реконструкция ишлари бошлаб юборилди. Футбол майдони сунъий қопламали. Бу борада муаммо йўқ. Бироқ стадионда жамоалар ва мухлислар учун етарли шароитлар яратиш лозим. Шу боис, биз Навоийда ўйнашга мажбур бўлдик.