2016 йил, 18 март куни Тошкент давлат иқтисодиёт университетида Рио–2016 Олимпиада ўйинларига йўлланма олган спортчилар, мураббий ва мутахассислар билан учрашув ўтказилди. Бу ҳақда «Дарё» мобил мухбири Ойбек Хосилбеков хабар берди.

Тадбирда ўзбек футболининг таниқли намоёндалари Рустам Акрамов, Миржалол Қосимов, Шуҳрат Мақсудов, ФИФА рефериси, халқаро тоифадаги футбол ҳаками Равшан Эрматов, дзюдочилар Рамзиддин Саидов, Ришод Собиров, Болтабой Болтаев, таэквондочилар Дмитрий Шокин, Умида Абдуллаева ҳамда бир гуруҳ ўзбек спортининг юлдузлари ва фахрийлари иштирок этди.

Тадбир давомида спортчилар талабаларга ўз фаолиятлари, спортда эришган натижалари тўғрисида гапириб, ютуқларни қўлга киритишда инсон қалби туядиган ҳис-туйғулар ҳақида сўзлаб берди. Шунингдек, тадбирда спортчиларни тантанали тақдирлаш маросими бўлиб ўтди ва талабалар спортчилардан дастхатлар олди.

Тадбир сўнгида барча спортчилар Наврўз умумхалқ байрами муносабати билан ўтказилган акция учун фотосессияга таклиф этилди.