Мадриднинг «Реал» клуби ярим ҳимоячиси Орельен Тчуаменининг эҳтимолий трансферига оид янги тафсилотлар маълум бўлди.
Аввалроқ «Манчестер Юнайтед» футболчига қизиқиш билдираётгани ҳақида хабар берилган эди. Журналист Бен Жейкобснинг сўзларига кўра, ҳозирча «қаймоқранглилар» франциялик футболчини сотишга рози бўлиши бўйича аниқ кафолатлар йўқ. Клуб ҳатто у билан шартномани узайтириш вариантини ҳам кўриб чиқиши мумкин.
Бироқ «қироллик клуби» ёзги трансфер ойнасида ярим ҳимоя чизиғини кучайтириш ниятида ва бунинг учун қўшимча маблағ зарур бўлади. Мадридликларнинг асосий нишонлари қаторидан «Манчестер Сити» аъзоси Родри ва «Челси» вакили Энцо Фернандес ўрин олган. Ҳозирда «Реал» Тчуаменини 80 миллион евродан (70 млн фунт) кўпроққа баҳоламоқда.
«Манчестер Юнайтед» учун эса Каземиро кетганидан сўнг «олтилик» позициясини тўлдириш устувор вазифага айланган. Манкунианликларнинг қизиқишлар доираси анча кенг:
-
Асосий нишонлар: Тчуаменидан ташқари, «Ноттингем Форест» вакили Эллиот Андерсон (унга «Ман Сити» ҳам даъвогар) ва «Ньюкасл» аъзоси Сандро Тонали. Аммо италиялик футболчининг нархи ва маоши «МЮ» учун қимматлик қилиши мумкин.
-
Бошқа номзодлар: Клуб рўйхатида шунингдек, Карлос Балеба («Брайтон»), Адам Уортон («Кристал Пэлас»), Жоао Гомес («Вулверхэмптон»), Алекс Скотт, Тайлер Адамс (иккаласи — «Борнмут»), Анжело Штиллер («Штутгарт») ва Эдерсон Лоуренсо («Аталанта») каби номлар бор.
Тчуаменига яқин манбаларнинг таъкидлашича, футболчининг ўзи ҳозирда Мадрид клубидаги фаолиятидан мамнун. Бу трансфер амалга ошиши «Реал»нинг янги харидлар учун маблағга қанчалик муҳтожлигига боғлиқ бўлади.
