23-28 март кунлари “Бунёдкор” футбол клуби ташаббуси билан “Наврўз кубоги-2016” мусобақаси ташкил этилди.

Мусобақада 2001 йилда таваллуд топган футболчилардан иборат 8та жамоа иштирок этди. Учрашувлар “Бунёдкор” футбол мактаби майдонларида ўтказилди.

Бош соврин учун кечган баҳсда “Бунёдкор” ва “Насаф” жамоалари куч синашишди. Учрашувнинг асосий вақтида кучлар тенг келди – 0:0. Шундан сўнг, пенальтилар сериясига мурожаат қилинди. “Лотореялар баҳси”да омад қаршиликларга кулиб боқди.

Учинчи ўрин учун кечган баҳсда “Андижон” тарбияланувчилари “Бухоро”дан 2:0 ҳисобидан устун келишди.

Мусобақа якунида тантанали ёпиилиш ва тақдирлаш маросими бўлиб ўтди. Унда “Бунёдкор” ва Ўзбекистон терма жамоаси собиқ футболчиси Александр Хвостунов иштирок этди ва номинация бўйича аниқланган ғолибларни асосий жамоа футболчилари имзолари туширилган тўплар билан тақдирлади:

Энг яхши дарвозабон – Абдувохид Неъматов (“Насаф”)
Энг яхши ҳимоячи – Иброхим Иброҳимов (“Бухоро”)
Энг яхши ярим ҳимоячи – Пахлавон Комилжонов (“Андижон”)
Энг яхши тўпурар – Эльнур Жариқулов (“Насаф”)
Энг яхши футболчи – Музаффар Олимжонов (“Бунёдкор”)

Футбол профессори, Ўзбекистонда хизмат кўрсатган мураббий Рустам Акрамов ғолиб ва совриндорларни кубок ва медаллар билан тақдирлади.

Мусобақа ғолиб ва совриндорларини табриклаган ҳолда, турнирни яхши савияда ўтишига ўз ҳиссасини қўшган Тошкент шаҳар футбол федерациясига миннатдорчилигимизни билдирамиз.

Эътиборингизга “Наврўз кубоги-2016”нинг тантанали ёпилиш ва тақдирлаш маросими тадбири ФОТОЖАМЛАНМАси ва видеошарҳини ҳавола этамиз.