Россия чемпионатининг 22-тури доирасида "Краснодар" Москвада "Динамо" клуби меҳмони бўлди ва йирик ҳисобда ғалаба қозонди.

Ҳисобни динамочилар очишди. 27-дақиқада Ионов пенальтидан самарали фойдаланган бўлса, орадан 4 дақиқа ўтиб меҳмонлар ҳам пенальтидан ҳисобни тенглаштиришди: Павел Мамаевнинг зарбасини дарвозабон қайтара олмади.

Иккинчи бўлим бошида Подберёзкин жарима майдончаси ташқарисидан кучли зарба билан "Краснодар"ни ҳисобда олдинга олиб чиқди.

Кейинги дақиқаларда Кононов шогирдлари "Динамо" дарвозасини икки марта ишғол қилишди. Одил Аҳмедов жамоадоши билан "девор" ўйнаб, жарима майдончасига кирмоқчи бўлганида, тўп ҳимоячининг оёғида унинг ўзига келди. У дарвозабон майдончасига яқинлашди ва орқадан ёрдамга келган шеригига узатма берди. Смолов яқин масофадан зарба бериб, ҳисобни 1:3га етказди.

Ўзбекистон терма жамоаси сардори ўз ҳисобига гол ёзиб қўйишга ҳам улгурди. Қарши ҳужумда олдинга борган Одил 16 метрлардан айланма зарба билан дарвоза бурчагини аниқ нишонга олди.

Ушбу ғалабадан кейин "Краснодар" ўз очколарини 37тага етказди ва 6-ўринга кўтарилиб олди. Жамоа пешқадам "Ростов"дан 7 очко ортда қолмоқда.

Статистикага кўра, бу ўйинда Одил Аҳмедов 11532 метр масофани босиб ўтган бўлса, у 74та узатмани амалга оширган. Унинг паслари аниқлиги 74 фоизни ташкил қилди.

Россия Премьер-лигаси, 22-тур
Динамо – Краснодар 1:4 (1:1)
Голлар: 1:0 – 27, пенальти Ионов, 1:1 – 31, пенальти Мамаев, 1:2 – 47 Подберезкин, 1:3 – 69 Смолов, 1:4 – 82 Одил Аҳмедов.
Динамо – Габулов, Дьяков, Хульмен, Ещенко, Морозов, Ионов, Живоглядов, Зобнин (Ташаев, 77), Драгун (Кузьмин, 55), Соснин, Бечирай (Погребняк, 46).
Краснодар – Крицюк, Гранквист, Сигурдссон, Калешин, Петров, Ахмедов, Каборе, Подберёзкин (Ари, 64), Перейра, Мамаев (Быстров, 79), Смолов (Марков, 82).
Огоҳлантиришлар: Драгун (30), Смолов (32), Калешин (61), Перейра (73).