Осиё чемпионлар лигасининг 4-тури доирасида "Бунёдкор" Эронда "Зоб Оҳан" меҳмони бўлди ва йирик ҳисобда ғалаба қозонди.

Учрашувнинг 3-дақиқасидаёқ Исмоилифар томонидан йўлланган зарбани Зуҳуров қайтара олмади. Дарвозабонимиз тўпга ташланишда кеч қолди.

Биргина мана шу голнинг ўзи Лушчаннинг қарши ҳужумдан иборат бўлган асосий режасини йўққа чиқариб қўйди. "Қалдирғочлар"да пишиқ-пухта қўшимча режанинг ўзи йўқ эди. Натижада вакилларимиз на позицион ҳужумни қойиллатишди, на ҳимояни. Боз устига, 34-дақиқада бурчакдан етказилган узатмани Воҳид Муҳаммадзода бош билан дарвозага жойлаб қўйди.

Иккинчи бўлим бошида исфаҳонликлар томонидан киритилган гол барча масалага узил-кесил нуқта қўйди. Ўйин тугашига 20 дақиқа қолганида "Зоб Оҳан" тўртинчи голни "Бунёдкор" дарвозасига жойлади.

Ана шундан кейин ё тошкентликлар уйғонишди, ёки мезбон жамоанинг рақибга раҳми келди шекилли, ҳар ҳолда жамоамиз иккита гол уришга муваффақ бўлди. Ўз навбатида майдон эгалари бешинчи голни ҳам Зухуров дарвозасига жойлашди — 5:2.

Ушбу ғалабадан кейин "Зоб Оҳан" ўз очколарини 8тага етказиб, гуруҳда якка пешқадам бўлиб олди. "Бунёдкор" эса очко билан 4-поғонага тушди.

ОЧЛ, "В" ГУРУҲИ, 4-ТУР
"ЗОБ ОҲАН" - "БУНЁДКОР" - 5:2
Голлар: Даниал Исмоилифар (3), Воҳид Муҳаммадзода (34), Маҳди Ражабзода (50), Кавеҳ Ризоий (69), Табиризий (88) — Сато Минори (78), Шаҳзодбек Нурматов (89)
"Зоб Оҳан": 12.Муҳаммадрашид Мазаҳерий, 3.Волид Исмоил, 4.Ҳоди Муҳаммадий, 8.Қосим Ҳадодифар, 9.Кваеҳ Ризоий, 15.Эҳсон Паҳлавон, 16.Макҳдипур Маҳдий, 18.Али Ҳамам, 23.Дониёл Исмоилифар, 30.Маҳди Ражабзода, 33.Воҳид Муҳаммадзода
"Бунёдкор": 25.Муроджон Зуҳуров, 2.Акмал Шораҳмедов, 3.Акром Комилов, 9.Сато Минори, 10.Элдор Шомуродов, 14.Баҳодир Насимов, 17.Достонбек Ҳамдамов, 22.Рустам Ашурматов, 29.Отабек Шукуров, 30.Юрица Булят, 71.Александар Алимпиевич
Бош ҳакам: Ма Нинг (Хитой)