Хабар берганимиздек, ОФК Кубоги баҳсларида 4-тур учрашувлари бўлиб ўтмоқда.

Ҳамюртимиз Шоҳруҳ Гадоев фаолият олиб бораётган Баҳрайннинг “Муҳаррақ” клуби 4-тур доирасида Суриянинг “Ал Жаиш” жамоаси меҳмони бўлди. Жуда қизиқарли тарзда ўтган матчда Баҳрайн клуби 2:0 ҳисобида ғалаба қозонди ва ОФК Кубогидаги муваффақиятли одимини давом эттирди.

Азиз Асимов бошчилигидаги ўзбекистонлик ҳакамлар бригадаси бошқариб борган ўйинда дастлаб Исмоил Абдуллатиф Ҳасан 34-дақиқада ҳисобни очганди. Сўнг “Муҳаррақ”нинг яна бир аъзоси – ўзбекистонлик маҳоратли ярим ҳимоячи Шоҳруҳ Гадоев ҳам ўз номини таблога ёздириб қўйди.

Ҳамюртимиз ўйиннинг 47-дақиқасида жуда чиройли тарзда рақиб дарвозасини ишғол этди.

Ҳамюртимиз ўйинда 82 дақиқа майдонда ҳаракат қилди. У шунингдек, баҳснинг 43-дақиқасида ҳакам томонидан огоҳлантирилди.