Олий Лигада 6-тур беллашувларига старт берилишини биласиз. Тур доирасидан ўрин олган қизиқарли тарзда ўтиши тахмин қилинаётган матчлардан бири Андижонда “Андижон” ҳамда “Сўғдиёна” жамоалари ўртасида кечади.
Сўнгги турларда анча барқарор ўйин намойиш эта бошлаган жиззахликлар жамоасидан бу турда ҳам кўпчилик ижобий натижа кутмоқда. “Сўғдиёна”нинг “Андижон” билан ўйинга кўрган ҳозирлиги борасида маҳоратли ярим ҳимоячи Санжар Рашидовнинг фикрлари билан қизиқдик.
- Ўйин жуда қизиқ ва муросасиз руҳда ўтиши табиий. Зеро “Андижон”га ҳам, бизга ҳам очко жуда зарур. Шу сабабли ҳам ҳар иккала клубнинг ҳам майдонга фақат ғалаба илинжида чиқиши тайин. Қолаверса, андижонликлар ўз мухлислари қаршисида ўйнашади. Бу бизга янада қийинчилик туғдиради. Лекин “Сўғдиёна” сафарга фақат очко учун йўл олди. Жамоамиз ўйинга яхши ҳозирлик кўрди. “Локомотив” билан дуранг ўйнаганимиз ва ўтган турда “Нефтчи”ни мағлуб этганимиздан сўнг йигитларда руҳият анча кўтарилди. Насиб этса, “Андижон”ни ҳам мағлуб этамиз, - дейди “Сўғдиёна” етакчиларидан бири SPORTS.uz интернет-портали мухбирига.
Таъкидлаб ўтамиз, “Андижон” – “Сўғдиёна” учрашуви эртага соат 17:30да бўлиб ўтади.
