"Олмалиқ" - "Навбаҳор" жамоалари ўртасидаги учрашувдан сўнг ҳар икки клуб бош мураббийлари ўйин тўғрисида ўз фикрларини билдиришди. Биринчи бўлиб меҳмонлар бош мураббийи Рашид Ғофуров саволларга жавоб берди.
Рашид Ғофуров: - Олдин ҳам айтганман, бизнинг жамоа янги шаклланган ҳисобланади. Ҳар гал шу гапни такрорлаш кимгадир ёқмаслиги мумкин, лекин ҳозир жамоамизнинг муваффақиятсизлигига бу жихат ўз таъсирини ўтказмоқда. Таркибда ҳамжихатликни яратишимиз учун кўпроқ бирга шуғулланишимиз керак. 17 та футболчини бирданига майдонга чиқариб ижобий натижа кўрсатиш қийин масала деб ўйлайман.
Бугун агарда иккинчи бўлимда намойиш этган ўйинимизни биринчи таймда кўрсатганимизда, нафақат дуранг балки ғалаба билан ҳам ортимизга қайтишимиз ҳам мумкин эди. Биринчи бўлимда тезкор гол ўтказиб юборганимиз йигитларни тушкунликка тушириб қўйди. Иккинчи бўлимда ўйин борасида ютдик, лекин шундай ўйинни учрашувнинг биринчи ярмида кутгандик. Биринчи бўлимда совуққонлик ва хотиржамлик бизга етишмади. Футболчиларга илк 15 дақиқа ичида тўпни назорат қилиш лозимлигини, шунда ўйин босими пасайиб барчаси ўз изига тушини таъкидлагандим. Агар айтганларимни бажаришганида, тезкор голни қўйиб юбормаган бўлар эдик.
