30 апрель куни Намангандаги “Марказий” ўйингоҳда бўлиб ўтадиган “Навбаҳор” ва “Обод” ўртасидаги учрашувга ҳар икки жамоа аъзолари ҳам тайёргарликни давом эттиришмоқда. Александр Волков бошчилигида шуғулланаётган футболчиларимиз бугун эрталаб ўйиндан олдинги сўнгги машғулотни ўтказишди. “Олмалиқ” билан ўтган ўйинда жароҳат туфайли қатнаша олмаган жамоамиз сардори Хайрулла Каримов ҳам умумий гуруҳда шуғулланаётганлигини айтиб ўтиш жоиз. Ҳозирда якка тартибда украиналик футболчи Владислав Павленко ва жароҳатидан кейин тикланиш жараёнини ўтказаётган Ғайрат Жўраевлар шуғулланишмоқда холос.
Қолган футболчиларнинг барчалари соғ ва саломат. Айни пайтда Наманганга етиб келишга улгурган “Обод” жамоаси бугун кечки пайт ўйиндан олдинги сўнгги машғулотни “Марказий” ўйингоҳда ўтказади. Бобир Зуҳриддинов бошчилигидаги жамоа аъзолари шаҳримиздаги “Туркистон” меҳмонхонасига жойлашишган.
