“Барселона” ҳужумчиси Луис Суарес учун ушбу мавсум жуда ҳам омадли келмоқда. У Ла лигада Роналду ва Мессининг гегемониясига баҳам бераётгани ҳам сўзимизга исбот бўла олади. Биз уругвайлик ҳужумчининг 2015/2016 йилги мавсумда қайд этган рекордларига тўхталиб ўтишни жоиз деб топдик.



1. ХХ I аср рекорди
Уругвайлик ҳужумчи Испания чемпионатида “Депортиво”га қарши баҳсда 4 та гол уриб, яна 3 та голга ҳаммуаллифлик қилди. Шу тариқа Суарес ХХI асрда Испания чемпионатида бир ўйинда 7 та голда қатнашган илк футболчига айланди.

2. Примьеродаги ягона футболчи…
Суарес чемпионатнинг 34 ва 35-турларида “Депортиво” ва “Спортинг” жамоалари билан кечган баҳсларда 4 тадан гол урди. Натижада Луис Испания чемпионатида кетма-кет икки учрашувда “покер” қайд этган илк футболчи бўлди.

3. Роналду ва Мессидан тезроқ
Луис Чемпионлар лигасида 15-голини уриш учун 23 та ўйинда майдонга тушишига тўғри келди. ЧЛда 15 гол киритиш учун Месси 29, Раул 33, Роналду 51 учрашув ўтказган. Демак уругвайлик бу борада афсонавий ҳужумчиларни ортда қолдирди.

4. Клублар ўртасидаги жаҳон чемпионатида “хет-трик”ка эришган илк футболчи
2015 йилнинг декабрида Суарес жамоаси билан бирга клублар ўртасидаги мундиалда иштирок этди. У ярим финалда “Гуанжоу”га қарши баҳсда 3 та гол уриб, мазкур мусобақада “хет-трик” қайд этган биринчи ва ҳозирча ягона футболчи бўлиб турибди.

5. Клублар ўртасидаг жаҳон чемпионатида 1 мавсумда энг кўп гол урган футболчи
Ярим финалда 3 та ва финалда 2 та гол урган Суарес ушбу турнирнинг бир мавсумида энг кўп гол урган футболчига айланди. Бунгача ҳеч бир футболчи бир мавсумда КЎЖЧда 5 та гол урмаган эди.

6. Чемпионатдаги энг омадли мавсум
Суарес Испания чемпионатининг ушбу мавсумида ҳозирча 37 та гол уришга муваффақ бўлди. Бу Луиснинг шахсий рекорди ҳисобланади. Бундан олдин у 2009/2010 йилги мавсумда “Аякс” сафида Голландия чемпионатида 35 та гол урганди.

7. Чемпионлар лигасидаги энг омадли мавсум
Уругвайлик ҳужумчи Чемпионлар лигасининг ушбу мавсумида 9 учрашувда 8 гол уриб, шахсий рекордини ўрнатди. Бундан олдин Суарес ўтган мавсумда 7 та гол киритганди.

8. Фаолиятидаги энг омадли мавсум
Луис Суарес ушбу мавсумда “Барселона” либосида 51 учрашувда майдонга тушиб, рақиблар посбонларини 56 марта ранжитишга муваффақ бўлган. Уругвайлик ҳужумчи бундан олдин 2009-2010 йилги мавсумда 48 ўйинда 49 гол киритган эди. Демак, Суарес бу борада ҳам шахсий рекордини ўрнатди.

Суарес мавсум якунларига кўра “Олтин бутса”ни қўлга киритса (бунга жуда яқин турибди) Роналдудан кейин иккита миллий чемпионат тўпурари бўлиб, ушбу мукофотга эга чиққан иккинчи футболчига айланади.

Фурқат Юсупов
“Реал”нинг “5” рақам эгалари. Зидандан Коэнтраугача
Швайштайгер: Фаолияти рақамларда. 10 факт