Хабарингиз бор, айни пайтда Осиёнинг энг кучли миллий чемпионатлари қаторида эътироф этиладиган Хитой Суперлигасида икки нафар ҳамюртимиз фаолият олиб боришмоқда. Миллий терма жамоамиз ҳимоячиси Егор Кримец “Бейжинг Гуоан” жамоаси сафида тўп сураётган бўлса, яна бир ўзбекистонлик ҳимоячи Анзур Исмоилов мана бир неча йилдирки “Чанчун Ятай” клуби шарафини ҳимоя қилиб келмоқда.
Таъкидлаш жоизки, “Чанчун Ятай” учун мавсум осон ўтаётгани йўқ. Жамоа мусобақа жадвалининг энг қуйи ўринларига тушиб кетди. Қолаверса, ҳамюртимиз Анзур Исмоилов 3-тур доирасидаги “Тианжин Теда”га қарши баҳсдан буён майдонга тушмаяпти. Ҳозирга келиб Суперлигада 8-тур ортда қолди.
Хўш, Анзур Исмоилов нега майдонга тушмаяпти? Ушбу саволга жавоб олиш мақсадида миллий терма жамоамиз мудофаа чизиғи вакилига мурожаат қилдик.
- Хитой Суперлигаси 3-тур учрашувлари доирасида кечган “Тианжин Теда”га қарши ўйинда тиззамдан жароҳат олдим. Тўғриси, жароҳат кутилмаганда орттирилди ва ўша учрашувни оғриқ кучли бўлгани боис охиригача ўйнай олмадим. Сўнг жароҳат нечоғлик жиддий эканини аниқлаш учун Германияга йўл олдим. У ерда докторлар чуқур текширув ўтказгач, тахминан бир ой давомида даволанишим лозим эканини айтишди. Мана бир ойдирки, майдондан ташқаридаман.
Эртага яна Германияга кўрикдан ўтиш учун йўл оламан. У ерда реабилитация жараёнини ўтайман. Бу эса тахминан яна уч ҳафта давом этади. Шундан кейингина машғулотларда қатнаша оламан.
Умид қиламанки, тикланиш жараёни тез ўтади ва жамоамга яна наф келтира бошлайман, - дейди тажрибали ҳимоячиSPORTS.uz интернет нашри мухбирига.
Таъкидлаб ўтамиз, Анзур Исмоилов 3 апрел куни бўлиб ўтган “Тианжин Теда”га қарши ўйиннинг 56-дақиқасида жароҳат олганди. Шундан буён футболчи “ўйиндан ташқари ҳолат”да бўлиб турибди.
