9-турдан ўрин олган баҳсда ёшларимиз Жиззахнинг "Сўғдиёна" ёшларига қарши майдонга тушишди.

Ғаллаорол туманида жойлашган стадионда ўтган учрашувда ёшлар жамоамизни рақибдан ташқари яна бир неча омилларга қарши курашиши лозим бўлди. Биринчи навбатда стадион ҳолати ўйинга тушишга тайёргарлик кўраётган футболчиларни ҳафсаласини пир қилди. Нотекис ва баъзи жойларида сув тўпланиб қолган майдонда мухлислар истаган футбол намойиш этиш мушкул эди. Дастлабки 45 дақиқани ҳар икки жамоа майдонга кўникма ҳосил қилиш учунгина ўтказди, дейиш мумкин. Иккинчи таймда ўйин бироз жонланди. Учрашувда ҳисобни очиш мезбонларга насиб этди. Жарима майдонига кириб бораётган Тимур Ҳакимов қўполлик билан тўхтатилди. Белгиланган пенальтини жабрланувчи аниқ амалга оширди. Бу ўйиннинг 53-дақиқасига тўғри келди. Орадан 11 дакиқа ўтиб Анвар Сапаров ҳисобни тенглаштиришга эришди. 74-дақиқада дарвозамиз томон иккинчи пенальти белгиланди. Бу гал Санжар Рихсибоев дарвозани ишғол этишга эришди. 88-дақиқада Абдулазиз Жўрабоев жаримадан ҳисобни тенглаштирди. Бу қарангки, мезбонлар қанот ҳаками кўрсатмаси билан 90+1-дақиқада учинчи марта пенальти тепиш ҳуқуқини қўлга киритишди. Роман Абдулов учинчи уринишда пенальтини қайтаришга эришди. Рихсибоев бу сафар дарвозани маҳв эта олмади. Тезлик билан ҳужум ташкил этган ёшларимиз Дониёр Набиев томонидан учинчи голни уришга эришишди. Ёшларимиздан ҳақиқий ирода намойиш этилди.