Кеча Риштон туманида марҳум спорт шарҳловичиси Давлат Турдиалиев хотирасига бағишланган футбол турнири бўлиб ўтди.
Мусобақа Риштон тумани Тўда шаҳарчаси фуқаролар йиғини раиси Шокиржон Қодиров ва футбол фидойиси Ўринбой Юсупов ташаббуси билан ташкил этилди. Мазкур турнирда Наманган вилояти ва Риштон туманидан ташкил топган тўртта фархийлар жамоаси иштирок этишди.
Мусобақа очилиш маросимида Давлат Турдиалиевнинг яқинлари ҳам қатнашишди.
Очилиш маросимида сўзга чиққанларнинг барчаси марҳум Давлат Турдиалиевни ёдга олишди.
– Мен Давлат Турдиалиев билан бирга катта бўлганман. Унинг шарҳларини мароқ билан тинглаб борар эдим. Сўнгги бора Давлат Турдиалиев билан 2014 йилги Жаҳон чемпионати пайтида учрашгандим… Бугун у кишини хотирлаб бу ерга жамланган барчадан миннатдорчилик изҳор этмоқчиман. Кези келганда, шуни айтишим жоизки, бу турнир ҳар йили анъанавий тарзда ўтказилади, деди Тўда шаҳарчаси фуқаролар йиғини раиси Шокиржон Қодиров.
Кейин сўз навбати марҳум шарҳловчининг акаси Холматжон Турдиалиевга берилди.
– Машҳур футболчилардан бири шундай деган экан. Мен бу дунёда нимага эришган бўлсам, барчаси футбол туфайлидир. Чиндан ҳам укам спорт сабабли бутун мамлакатимизга танилди. Мана бугун сизларни куриб кўзимга ёш келди. Укамни хотирлаб келган барчага раҳмат айтмоқчиман.
Очилиш маросимида шунингдек, Ўринбой Юсупов ва Мамадали Мўминовлар ҳам сўзга чиқишди.
Шундан сўнг, Наманганнинг “Навқирон” ва Риштоннинг “Оқ-Олтин” жамоалари майдонга тушишди. Ўйинда наманганликлар 4:1 ҳисобида ғалаба қозонишди ва финалга йўлланма олишди.
Иккинчи финалчи номи – Уйчининг “Хотира-79” ва Риштоннинг “Соғлом авлод” жамоалари ўйинидан аниқланди. Учрашувни кутаринки руҳда ўтказган “Соғлом авлод” жамоаси вакиллари 4:2 ҳисобида рақибдан устун келишди.
Ҳал қилувчи баҳсда “Навқирон” ва “Соғлом авлод” жамоалари тўқнаш келишди. Мусобақага яхши тайёргарлик билан ташриф буюрган “Навқирон” жамоаси вакиллари 4:1 ҳисобида ғалабага эришишди ва бош совринни қўлга киритишди.
Ғолибларни Тўда шаҳарчаси фуқаролар йиғини раиси Шокиржон Қодиров ва Давлат Турдиалиевнинг акаси Холматжон Турдиалиевлар тақдирлашди.
Фахрийлар ўртасида ўтказилган ушбу турнир барчада бирдек ёқимли таассурот қолдирганини ҳам таъкидлаш жоиз.
Ҳамидхон Мўйдинхўжаев ва Нўъмонжон Икромовлар турнирнинг энг яхши ўйинчилари сифатида тан олинди. Умуман олганда, 60 ёшдан ошган фахрийлар юқори савияда тўп суришди.
Давлат Турдиалиев хотира турнири
Ярим финал
“Навқирон” – “Оқ-Олтин” – 4:1
“Соғлом авлод” – “Хотира-79” – 4:1
Финал
“Навқирон” – “Соғлом авлод” – 4:1.
Аброр Деҳқонов
