Бугун куннинг иккинчи ярмида бир гуруҳ “Насаф” футбол клуби фаол мухлислари жамоа қароргоҳига ташриф буюришди. Қароргоҳда фаол мухлислар жамоа футболчилари ва мураббийлар билан учрашиб дилдан суҳбат қуришди.

Мухлисларни “Насаф” жамоаси бош мураббийи Рўзиқул Бердиев бошчилигидаги мураббийлар ва футболчилар илиқ кутиб олишди.

Учрашувда шунингдек мухлислар ўзларининг қизиқтирган саволларига жавоблар олишди. Футболчилар ва мураббийлар билан эсдаликка расмларга тушишди. Шундан кейин футболчилар мухлислар олдида ҳурмат учун саф тортишди. Футболчиларга қарата  клубнинг кўп йиллик фаол мухлисларидан Илҳом ака Саломов, Салоҳиддин ака Самадов, Ўктам Узоқов ва Зиёдулла Сафаровлар ўз тилакларини билдиришди. Жумладан, “Йигитлар аввало кўрсатаётган ўйинларингиз учун сизларга ўз ташаккуримизни билдирамиз. Шуни билингки, биз доимо сиз билан биргамиз, сизларни доимо қизғин қўллаб-қувватлаймиз, сизлар ҳар қандай мақтовга лойиқсиз. Бу йилги мавсумда чемпион бўлишларингизга қаттиқ ишонамиз. Сизлар бунга лойиқсизлар. Устозларингиз Рўзиқул Бердиевдан ўз ишига бўлган муҳаббатни, меҳнатсеварликни, жамоага бўлган содиқликни ўрганинг ва ўрнак олинг ана шунда халқ севган инсонга айланасиз, асло кам бўлманг. Олға йигитлар!”, - каби тилак сўзлар айтилди.

Шундан сўнг мухлислар футболчиларнинг машғулотларини томоша қилишди. Футболчилар эса кўтаринки руҳда ва яхши кайфият билан хушчақчақ ҳолда машғулотларини ўтказишди.

Ўзаро учрашувдан сўнг футболчилар ва мураббийлар номидан Рўзиқул Саъдуллаевич ташриф буюрганларга алоҳида миннатдорчилик изҳор этди.