«Манчестер Юнайтед»нинг собиқ дарвозабони Петер Шмейхель жамоага Жозе Моуриньо бош мураббий этиб тайинланиши мумкинлиги ҳақидаги хабарга ўз муносабитини билдириб ўтди.
«Моуриньо ҳамиша "Манчестер Юнайтед"ни бошқаришни истарди. Энди эса бундай имконият бор. Жозени бош мураббийликка танлаш — раҳбарият учун мураккаб қарор. Агар у ростдан ҳам керакли мутахассис бўлганида, уни эртароқ бу лавозимга тайинлашарди.
У футбол клублари директорлари, президентлари, шифокорлари билан уришиб чиққан. "МЮ"да эса бундай ишларни хоҳлашмайди.
Ишончим комил, буларнинг барчасида клубда муҳокама қилинган. Сэр Алекс Фергюсон ва сэр Бобби Чарльтоннинг розилигисиз Моуриньони клубга олиб келишмайди. У клубга келяптими, демак, бу яхши қарор.
Энди клубда жаҳоннинг энг яхши мураббийи дея эътироф этиладиган мутахассис бор. Ўйлайманки, у "Манчестер Юнайтед"ни қутқара олади. Бу дадил қарор, лекин хулоса чиқаришга эрта», дейди Шмейхель.